ERMERA, 04 novembru 2019 (TATOLI) – Xefe Sentru Saúde Gleno, José de Carvalho, informa moras ne’ebé sei rejista aas iha Sentru Saúde Internamentu ne’e maka Moras Infesaun Respiratóriu (Pneumonia).
“Moras ne’ebé komunidade enfrenta maka infesaun respiratóriu ho númeru aas tebes, ne’e maka konsidera barak iha sentru saúde ne’e no kuaze Timór laran”, tenik ba Agência Tatoli, iha Sentru Saúde Gleno, segunda ne’e.
Moras ne’ebé mak rejista aas tuir mai iha sentru saúde ne’e maka Moras Kulit no Tuberkoloze.
Nia dehan, moras infesaun respiratóriu aumenta ba bebeik tanba mudansa klima.
Alende ne’e nia subliña, iha moras temporáriu iha tempu udan hanesan diarreia no moras la hada’et sempre rejista maibé dala ruma ladún tau atensaun.
“Hanesan diabete, tensaun alta, no filariasi dala ruma sentru saúde la tau prioridade ba moras sira ne’e. Maski moras sira ne’e ladún tau atensaun maibé bele halo mate, tanba ne’e presiza kuidadu”, nia akresenta.
José de Carvalho dehan, ho kama hamutuk 24, sentru saúde ne’e atende pasiente iha 24 oras nia laran no simu moras referál husi Sentru Saúde Atsabe, Letofoho, Hatulia, Ermera no Railaco.
“Sira ne’ebé maka hetan tratamentu di’ak iha ne’e, bele fila fali ba komunidade maibé kuandu todan tuir diagnóstika médiku sira no labele kura entaun bele transfere ba Hospital Nacional Guido Valadares (HNGV)”, nia akresenta.
Jornalista: Osória Marques
Editór: Xisto Freitas
