K12N Rejista Sobrevivente Masakre Santa Krús 3.000

DILI, 12 novembru 2019 (TATOLI)-To’o oras ne’e, Komité 12 Novembru (K12N) rejista sobrevivente  Masakre Santa Krús, 12 novembru 1991, purvolta ema na’in 3.000 (seidauk verifika ho loloos) no juventude lori asua’in na’in 70-resin mak mate iha trajédia negra iha istória Timor nian ne’e.

Notísia Relevante : K12N Husu Konstrui Lalais Monumentu 12 Novembru 

Prezidente K12N nu’udar mós sobrevivente ba Masakre 12 Novembru 19991, Gregório Saldanha, liuhosi nia diskursu iha selebrasaun Loron Nasionál Juventude no Komemorasaun Masakre Santa Krús, ohin, hateten, Timor-Leste komemora tinan 28 Masakre Santa Krús hodi fó hanoin hikas kona-ba dedikasaun juventude loriku asua’in sira nia ne’ebé aten brani hodi hatutan luta frente armada nian no falun mundu internasionál ho ran hodi hateke mai Timor-Leste nia luta libertasaun.

Notísia Relevante :Fó Onra ba Loriku Asua’in Ne’ebé Mate, Tenke Hametin Unidade 
Gregório hateten, tinan 28 liu ba, juventude loriku asua’in ho lian kro’at hakilar no halo manifestasaun kontra okupasaun Indonézia. Juventude sira tempu ne’ebá hakilar sai Timor nia terus, Timor nia izolamentu no habadak dalan ba Timor nia luta ukun rasik-an.

“Juventude loriku asua’in nia luta eroiku hatudu ba mundu katak luta ba ukun rasik-an la’ós de’it  iha frente armada  ka frente externa, maibé ho moris foun iha frente klandestina fó tan enerjia no korajen ba diresaun luta,” Gregorio Saldanha hateten.

Bainhira mosu frente klandestina, Gregório fó sasin katak, katuas sira Frente Armada FALINTIL  sente la mesak ona, tanba nia oan juventude loriku asua’in prontu ona atu hatutan luta to’o ukun rasik an.

Ohin loron, Gregório tenik, Timor moris ona hanesan nasaun independente no soberanu. Tanba ne’e, hirak ne’ebé sei moris merese agradese no respeita ba saudozu sira nia obra no sakrifisiu hodi hala’o servisu ba unidade nasionál no dezenvolvimentu nasionál.

 Merese Hetan Tratamentu ho Dignu

Prezidente K12N, Gregório Saldanha, husu  ba oitavu governu konstitusionál ne’ebé lidera hosi Primeiru-Ministru Taur Matan Ruak, atu halo investimentu hadi’a fasilidade saúde iha ospitál sira hodi halo tratamentu sériu ba sobrevivente sira no povu tomak ho dignu.

Tuir Prezidente K12N ne’e katak, realidade hatudu durante ne’e sei iha diskriminasaun ema rezisténsia balun seidauk   hetan   tratamentu saúde iha diskriminasaun.

“Ami iha  esperiénsia ladi’ak, ami nia kolega Mau Laco  sai hanesan  referénsia uainhira moras iha diskriminasaun ba tratamentu saúde,” hatete Gregório Saldanha.

K12N mós fó hanoin ba governu atu halo selesaun no fó prioridade  ba ema rezisténsia  sira nia-oan hodi haknaar-an  iha instituisaun xave sira  iha area defeza no seguransa  hanesan F-FDTL ho PNTL.

Gregório Saldanha mós husu  ba  joven sira  respeita lei no orden publika no para ona ho violénsia foku ba ida-idak nia eskola hodi sai matenek kontribui ba dezenvolvimentu ne’ebé ho kualidade.

 Lider Nasionál Presiza  Ko’alia ba Malu

Iha biban ne’e, Prezidente K12N, Gregório Saldanha, kontinua husu  ba lider nasionál sira buka atu tur hamutuk hodi hakotu impase polítika ne’ebé la’o kleur ona laiha solusaun to’o ohin loron.

K12N nota katak, problema ne’e akontese tanba laiha konkordánsia entre polítiku nain sira ida-idak la’o ninian. K12N mós la konkorda atu iha tan eleisaun antesipada daruak, tanba sei  gasta tan povu nia osan no halo kolen tan povu.

“Dala ida tan husu ho laran kaman ba maun boot sira  atu kontakta malu, buka no ko’alia ba malu atu rezolve problema ruma ne’ebé ohin loron seidauk rezolve atu nune’e dezenvolvimentu bele la’o lalais,” hateten Gregório Saldanha.

Prezidente K12N ne’e  espera no iha konfiansa ba lider nasionál ho problema ne’e sempre sei iha solusaun. Tanba lider nasionál sira mai husi hun ida, koñese malu di’ak no karaterístiku ida.

Jornalista : Nelson de Sousa

Editór       : Francisco Simões