DILI, 14 novembru 2019 (TATOLI) – Hafoin akontesimentu iha merkadu Aimutin iha fulan hirak liubá rendimentu negosiante roupa uzadu (obralan) menus kompara ho antes ne’ebé seidauk akontese problema, tanba daudaun movimentu ema sosa sasán menus nune’e afeta ba retornu.
“Ami-nia negósiu ne’e loke primeiru maka rendimentu di’ak uitoan, loron ida ami bele hetan osan hamutuk dólar 100-resin, maibé agora menus ona hafoin akontese problema ema oho malu iha fatin ne’e, tanba ema mai hola sasán mós menus, no bainhira ami hahú loke foun (roupa uzadu) mak ema sosa to’o dólar 80 más liu tiha loron ida ema la sosa ona”, hatete vendedora roupa Cilvina da Silva Freitas Amaral iha Aimutin, ohin.
Cilvina hatutan, tanba besik ona tama ba loron boot Natál, nune’e ema barak maka hahú fa’an roupa uzadu.
“Kona-ba seguransa iha ne’e seguru hela, maske antes ne’e mosu problema”, dehan Cilivina.
Nia dehan osan sira ne’ebé mak hetan hosi negósiu ne’e hodi sustenta família, hanesan fó eskola ba labarik.
“Ha’u sente osan ne’ebé hetan hosi negósiu ne’e sufisiente hodi uza ba nesesidade família”, katak nia.
Alfredo Monis nu’udar mós komersiante roupa uzadu, realsa katak halo neósiu durante tinan rua ona, no rendimentu depende de’it ba kompradór, loron-loron diferente.
“Kona-ba atu hetan osan depende ba sorte, loron ida hetan dólar 20, no iha loron seluk dala ruma hetan de’it hodi sosa netik nasi bungkus ba han loron ida nian. Osan ne’ebé hetan uza de’it ba nesesidsde família nian”, hakuir Alfredo Monis.
Alfredo dehan, bainhira sosa roupa uzadu ho osan $180 no atu hetan fali osan ne’e hein to’o semana ida maka foin hetan fali osan refere.
Tuir Alfredo hala’o atividade ne’e la sente halo kompetisaun tanba maioria roupa uzadu hanesan de’it depende ba sosa-na’in sira.
Entretantu, roupa ujadu ne’ebé sira fa’an, ba labarik nian folin mínimu $1,50 cent, no ema boot nian hosi $2.
Notísia relevante : Ema Sei “Trauma” ba Halo Kompra iha Obralan Ai-mutin
Jornalista : Antónia Gusmão
Editora : Maria Auxiliadora
