DILI, 25 novembru 2019 (TATOLI) – Diretór Investigativu Jeolojia no Minerál, Institutu Petróleu no Jeolojia (IPG, sigla Portugés), Elias da Silva Cabral, informa ekipa IPG sei halo peskiza ba mina no gás iha Munisípiu Baucau no Viqueque iha dezembru 2019 to’o juñu 2020.
Antes halo peskiza, daudaun ne’e IPG halo sosializasaun ba populasaun munisípiu rua ne’e atu koopera ho ekipa bainhira hahú peskiza. Objetivu husi sosializasaun mak atu fahe informasaun ba abitante sira hodi koopera no asegura ekipamentu peskiza (estudu) ho naran Amplified Geochemical Imaging (AGI) ne’ebé sei hakoi de’it iha rai ka bloku identifikadu sira.
“Ami halo ona sosializasaun ba komunidade sira atu koopera ho ekipa survey sira husi IPG nia atu asegura ekipamentu Amplified Geochemical Imaging (AGI) ne’ebé sei monta iha área Munisípiu Baucau no Viqueque nian iha dezembru tinan ne’e to’o juñu 2020”, Diretór Elias afirma ba TATOLI via telefone, ohin.
Diretór Elias friza ekipamentu ba peskiza nia hamutuk 141 ne’ebé sei monta iha área Baukau no Viqueque ne’ebé fahe ona ba bloku tolu hanesan; bloku oeste mak Venilale, Vemasse no Ossu, bloku sentrál iha Quelicai no Uatulari no bloku leste mak Laga no Baguia.
Objetivu husi estudu ne’e, nia dehan hakarak hatene iha munisípiu rua ne’e iha duni mina no gás ka lae? Tanba durante ne’e dadus iha IPG nian hatudu katak kamada fatuk ho sedimentáriu mahar tebes no dadus amostra kuaze iha pozitivu iha mina ho gás iha área ne’e.
“Iha ami-nia sosializasaun ne’e komunidade iha bloku tolu ne’e kuaze suporta maka’as no prontu koopera no asegura ekipamentu bainhira de’it ekipa IPG ba monta”, katak.
Tuir planu, Diretór IPG informa peskiza ne’e hahú iha loron 10 dezembru 2019 to’o juñu 2020, maibé, servisu ekipa IPG iha terrenu durante loron 42, karik rezultadu pozitivu (iha mina no gás) sei kontinua to’o hatene nia profundidade (kedalaman).
“Depois ami aprezenta relatóriu ba Governu atu foti desizaun, maibé teknikamente ami sei hala’o perfurasaun estratigrafia hodi hatene nia profundidade”, nia espera.
Notísia relevante : AGG Ramata Ona Peskiza no Iha Hela Prosesamentu Dadus
Jornalista: Florencio Miranda Ximenes
Editora : Maria Auxiliadora
