Assanami Propoin Hasa'e Saláriu Ba Médiku Sira
DILI, 26 novembru 2019 (TATOLI)–Deputadu Partidu Demokrátiku (PD), Mariano Sabino Assanami, propoin hasa’e saláriu ba médiku sira nune’e evita médiku sira buka osan iha klínika privada.
“Ita presiza fó valór ba ita-nia doutór sira no fó osan ne’ebé ke di’ak para sira labele buka osan fali iha klínika privada hodi sira bele konsentradu”, nia dehan ba Agência TATOLI, iha resintu Parlamentu Nasionál, tersa ne’e.
Tuir nia katak kuandu doutór timoroan sira hetan ona saláriu di’ak, atendementu sei la’o di’ak liu.
Aleinde ne’e, Assanami informa, presiza profisionaliza ospitál rejionál sira atu haree loloos moras sira-ne’ebé ke todan, nune’e la presiza ba rai-li’ur, maibé governu tenke investe maka’as iha rekursu umanu saúde nian.
Deputadu ne’e husu Governu kria polítika ida di’ak ba doutór timoroan sira, nune’e tinan lima ka tinan 10 mai Timor-Leste mós bele iha doutór espesialista barak.
Nia argumenta, bainhira doutór espesialista hosi li’ur fila ba sira-nia rain, doutór timoroan bele kapasitadu ona.
Eis Governante ne’e mós hateten tama ona tinan 20 maibé atendimentu iha ospitál nafatin sai problema, tanba ne’e Governu tenke buka hatene ninia fukun.
Jornalista: Evaristo Soares Martins
Editór: Xisto Freitas
