DILI, 10 dezembru 2019 (TATOLI) –Joven na’in tolu ho inisiál MJBV, JRD ho URB, iha segunda (09/12) halo agresaun fízika hasoru Xefe Suku Bebonuk, Serafín Macedo ho Membru Konsellu Polisiamentu Komunitariu (KPK), Vidivio Fátima iha Aldeia Metin Kuatru, Suku Bebonuk, Postu Administrativu Dom Aleixo, Munisípiu Dili.
Kazu ne’e akontese mazumenus tuku 10:00 Otl kalan, bainhira joven sira lansa mal trata hasoru membru KPK no Ofisiál Polisiamentu Suku (OPS) sira ne’ebé halo hela patrullamentu.
Hosi asaun agresaun fízika ne’e, Xefe Suku Serafín Macedo, hetan pankada makaas iha matan fukun no membru KPK, Vidivio Fátima nia matan nakles parte karuk ho suku pontu hamutuk lima.
“Ami halo hela patrullamentu, joven sira tuur nakonu iha estrada, ami husu sira atu fila ba uma, maibé ita nia alin sira tolok fali OPS no KPK. Nune’e ha’u buka tuir joven sira atu husu razaun tolok, derrepente iha nakukun laran sira tuku uluk membru KPK ne’e. Nune’e ha’u mós tun atu satan asaun baku, maibé joven sira tuku tan ha’u monu ba rai hodi tebe tan ha’u nia matan too bubu,”Konta tuir Xefe Suku Serafín ba jornalista, hafoin aprezenta keixa ba Polisia Eskuadra Dom Aleixo Ai-Mutin Dili, ohin.
Autoridade Suku Bebonuk ne’e lamenta ho atetude ninia joven na’in tolu ne’e, tanba falta respeita hasoru lideransa komutária.
“Ha’u husu para polisia prosesa kazu ne’e tuir lei, tanba bainhira joven baku ona ami autoridade ne’e buat la di’ak ida,” Xefe suku lamenta.
Dadaun ne’e, suspeitu na’in rua entrega aan ona ba Polisia eskuadra Comoro, no falta na’in ida maka sei kontinua subar.
Xefe Suku ne’e apela ba populasaun iha Suku Bebonuk atu respeita knaar autoridade lokál, OPS, KPK no seluktan.
Iha parte seluk, Vidivio Fátima, lamenta ho akontesimentu ne’e tanba ne’e nia hakarak atu prosesa kazu ne’e tuir lei ne’ebé vigór.
Entretantu, tersa ohin, OPS Bebonuk, Ajente Xefe, Gidio da Silva Monteiro, ho membru KPK halo kedas mediasaun ho inan-aman husi suspeitu na’in tolu nian atu entrega sira-nia oan ba polisia hodi submete ba prosesu investigasaun.
Durante mediasaun, Suspeitu URB, hato’o ninia deskulpa ba Xefe Suku ho membru KPK ne’ebé sai vítima ba akontesimentu ne’e.
Komandante PNTL, Komisáriu Faustino Cardoso, lamenta ho asaun krime ne’ebé akontese iha Bebonuk tanba ne’e nia fó ona instrusaun ba Polisia eskuadra Comoro atu halo investigasaun profunda ba kazu refere.
Jornalista: Eugénio Pereira
Editór :Francisco Simões
