DILI, 10 dezembru 2019 (TATOLI)-Komandante Polisia Nasionál Timor-Leste (PNTL)Komisáriu Faustino da Costa, informa dezde tinan 2005 to’o agora rejista membru Polisia hamutuk na’in 18 maka partisipa ona misaun dame iha Organizasaun Nasaun Unida(ONU).
Komisáriu PNTL Faustino da Costa , hato’o relatóriu ne’e bainhira hamutuk ho Polisia Nova Zelándi ho Guarda Nasionál Republikana (GNR) hodi selebra aniversáriu tinan 14 partisipasaun PNTL ba misaun dame ONU.
Timor-Leste hahú delega ninia kontijente hamutuk membru polisia na’in 10 hodi partisipa misaun ONU iha Kosovo iha loron 9 fulan-dezembru 2005 durante mandatu Eis Ministru Interiór, Rogério Lobato.
“Hosi 2005 to’o mai agora totál membru PNTL na’in 18 maka partisipa ona iha misaun dame ONU komesa hosi superiór too sarjentu. Agora ita iha membru 14 ne’ebé ONU mai halo teste prontu ona para atu haruka ba Sudaun Súl, Libanon no Haití,” dehan, Faustino ba jornalista iha Komandu Jerál PNTL Caicoli,ohin.
Iha tinan 2005, ekipa kontijente Timor-Leste nian lidera hosi Atuál Xefe Servisu Investigasaun Kriminál Nasionál (SIKN) Superintendente Xefe, Henrique da Costa.
Hosi totál polisia na’in 10 ne’e, na’in ida kompleta misaun durante tinan 1, no na’in hitu kompleta tinan ida ho balun, no na’in rua seluk kompleta tinan rua.
Tuir mai iha fulan-fevereiru 2011, Komandu PNTL haruka tan membru na’in rua partisipa misaun dame ONU iha Guinea-Bissau durante tinan rua no iha 2012, kontinua haruka tan membru polisia na’in tolu ba Guinea-Bissau.
Iha 2013, PNTL kontinua delega tan membru hamutuk na’in tolu ba iha nasaun Guinea-Bissau. No ikus liu iha 2016-2018 delega tan membru na’in ba misaun ONU.
“Prosesu rekrutamentu membru PNTL ba misaun ONU la’ós buat fasil, tanba prosesu selesaun haree ba kapasidade no koñesimentu kle’an kona-ba lei sira, labele envolve iha kualkér kazu no respeita direitu umanu,”hateten Komisáriu PNTL.
Jornalista: Eugénio Pereira
Editór :Francisco Simões
