LAUTEM, 13 dezembru 2019 (TATOLI) – Diretór Servisu Munisípál Agrikultura (SMA), Edmundo da Costa, dehan tratór boot hamutuk 40, maibé 28 maka aat hotu ona no 12 mak sei halo operasaun.
“Tratór 40, hela de’it 12 maka sei halo operasaun, seluk ne’e ita bele dehan kondisaun aat hotu ona”, Diretór ne’e katak ba Ajénsia TATOLI iha Lospalos, kinta ne’e.
Nia salienta katak tratór ne’e nia pesa no rolamentu kuaze aat hotu, maibé jestaun ba manutesaun ekipamentu agríkola sentraliza iha nasionál, tanba ne’e tenke halo proposta maka foin bele halo manutesaun.
“Uluk 2018, osan ba manutesaun hamutuk $2000, maibé agora hatún fali 500, ami aprezenta relatóriu de’it ba nasionál atu mai halo manutensaun, más la aprova”, lamenta.
Hodi dehan planu iha maibé osan laiha, ne’ebé hein de’it atu lori ba patrimóniu Estadu hodi hadi’a.
“Ita halo limitasaun kada família tenke etare 1 iha suku hotuhotu to’o udan monu rai, fim dezembru tenke para hotu”, katak.
Jornalista : Florencio Miranda Ximenes
Editora : Maria Auxiliadora
