DILI, 16 dezembru 2019 (TATOLI)—Xefe Sentru Saúde Formoza, Jaimé dos Reis Belo hateten infraestutura uma iha Sentru Saúde Formosa ne’ebé agora daudaun aat maibé to’o agora seidauk iha reabilitasaun ruma husi Governu Timor-Leste.
Maske nune’e, nia infroma, iha Organizasaun Naun Governamental (ONG) husi estranjeiru balun ne’ebé sai amigu ba Timor-Leste liuliu husi Austrália mak fó apiu hodi hadi’a cube house tuir sira-nia kondisaun.
Iinfraestutura uma iha Sentru Saúde Formosa ne’ebé agora daudaun aat to’o agora Governu seidauk hadi’a. Husi ONG Maluk Timor Austrália ne’ebé mak hadi’a ona cube house konsulta fatin ne’e, maibé sira hadi’a mós tuir kondisaun ne’ebé mak sira iha tanba iha uma nia laran ne’e aat hotu ona,” nia infroma.
Nia hatutan, la’os cube house de’it maibé infraestrutura husi sentru saúde ne’e mós aat ona liuliu ba iha liña eletrisidade nian no fatin konsulta ba labarik sira ne’e mós aat hotu ona. Maibé, nia dehan, preokupasaun sira ne’e nia parte relata ona ba Munisípiu Dili.
“Maibé ami husu ba Munisípiu Dili atu reforsa tan ami maibé sira seidauk responde ba ami-nia preokupasaun ne’e,” nia dehan.
Entretantu nia dehan, hirak ne’e hanaran pakote entaun pakote dahuluk mak infraestutura, transporte, orsamentu, ekipamentu médiku, hirak ne’e sai hanesan baze ida fó motivasaun ba pesoál saúde sira para halo servisu ho di’ak.
Nia infroma, la’ós infraestutura de’it mak nia kondisaun la di’ak maibé ambulánsia mós aat no ekipamentu hanesan termometru mós nia kuantidade menus tanba populasaun iha Dili ne’e barak mak mai konsulta iha sentru saúde formosa.
Notísia relevante:Sentru Saúde Formosa Infrenta Difikuldade Ba Ambulánsia
Jornalista : Felicidade Ximenes
Editór : Rafy Belo
