Hahú husi loron ohin hahú tama ona ba vida foun, vida ne´ebé nakonu ho dezafiu. Susesu ida ne´e mak ne´e ona, lae, maibé dezafiu eh obstákulu sei barak liután iha oin. Nune’e imi ho imi-nia esperiénsia, imi ho imi-nia matenek, imi ho imi-nia korajen, labele dezanima enfrenta dezafiu sira ne’ebé imi sei hasoru
DILI, 16 dezembru 2019 (TATOLI)-Universidade Nasionál Timor Lorosa´e (UNTL), ohin, realiza serimónia graduasaun ba dala XXII ho estudante graduadu 834 iha CCD (Sentru Konvensaun Dili, sigla portugés), Dili.
Magnífiku Reitór UNTL) Fransisco Miguel Martins hateten ba graduadu sira ne´e katak hahú husi loron ohin hahú tama ona ba vida foun, vida ne´ebé nakonu ho dezafiu. Susesu ida ne´e mak ne´e ona, lae, maibé dezafiu eh obstákulu sei barak liután iha oin.
“Nune’e imi ho imi-nia esperiénsia, imi ho imi-nia matenek, imi ho imi-nia korajen, labele dezanima enfrenta dezafiu sira ne’ebé imi sei hasoru,” enkoraja Reitór Fransisco Miguel Martins, liuhusi nia diskursu perante graduadu sira hotu.
Tuir Reitór, fó de’it bukae ba estudante graduadu sira. “Imi atu halo rasik, imi mak buka rasik, partisipa iha prosesu dezenvolvimentu nasionál ida ne’e ho ita-nia komunidade”.
“Bukae ne’ebé ho imi, ohin justifika ho imi-nia kompeténsia akadémika, kompeténsia sientífika, ne’ebé ho komunidade tomak ne’ebé ohin iha ne’e, ita-nia korpus diplómatiku no inan-aman sira ne’ebé partisipa iha ne’e ba serimónia graduasaun ida ne’e, ” katak Reitór UNTL, Fransisco Miguel.
Iha biban hanesan, reitór ensinu superiór públiku ne´e agradese inan-aman sira tanba kontribui no luta maka´as ba oan sira hahú loron dahuluk tama iha UNTL to´o, ohin, atu fila ba iha sosiedade, ba iha komunidade atu dezenvolve ita-nia rain. “La hodi imi-nia sakrifísiu, imi-nia oan sira ne’ebé tuur iha ne’e, sei la to´o iha ida ne’e, sei la to´o ohin loron”.
Akadémiku UNTL ne´e reforsa, ida ne’e agradese ua’in tebes ba inan-aman sira, enkarregadu ba edukasaun ne’ebé esforsu luta hamutuk ho oan sira ne’ebé oras ne’e daudauk tuur iha asembleia jerál akademika ida ne’e.
“Imi-nia luta tomak, imi-nia esforsu tomak ohin imi atu simu fila fali imi-nia oan sira ba iha imi-nia leet, iha komunidade nia leet no onra boot ida no orgullu bo’ot ida ba inan-aman sira tanba imi-nia luta la saugate”.
“Imi-nia luta iha rezultadu duni no simu duni rezultadu ne’ebé imi mós espera, hein hela durante tinan barak nia laran, dala ruma imi la iha vontade, dala ruma imi hirus, dala ruma imi si’ak, dala ruma imi-nia osan la iha, oan sira husu osan de’it osan de’it, husu de’it husu de’it, bainhira los mak imi atu ramata,” tenik reitór UNTL.
“Maibé imi-nia esforsu tomak, ohin imi simu duni imi-nia oan sira, ami entrega ba imi no entrega mós ba komunidade, ba ita-nia estadu, ba ita-nia governu atu serbi iha prosesu dezenvolvimentu nasionál ida ne’e”.
Iha oportunidade ne’e, Reitór UNTL kongratula mós estudante no inan-aman inklui mós governu.
“Parabéns ba estudante graduadu sira, parabéns ba inan-aman, parabéns ba ita-nia komunidade, parabéns ba ita-nia governu ne’ebé suporta ita hodi realiza ita-nia prosesu ensinu aprendizajen iha Universidade Nasionál Timor-Lorosa’e”.
Entretantu, Serimónia Graduasaun UNTL Ba dala XXII, 2019 ne´e, totál estudante graduadu hamutuk 834, fahe ba parte rua.
Husi parte dadersan nian ba Kursu Post-Graduasaun Maestradu, PGD hamutuk 44, Fakuldade Agrikultura hamutuk 67, Fakuldade Enjeñária, Siénsia no Teknolojia hamutuk 87, Fakuldade Medisina no Siénsia Saúde hamutuk 180, Fakuldade Filozofia hamutuk 26. Totál 404.
Iha parte lorokra´ik niaan, husi Fakuldade Edukasaun Artes no Humanidade 256, Fakuldade Siénsia Sosiál hamutuk 95, Fakuldade Ekonomia hamutuk 79, totál 430. Nune´e totál graduadu UNTL iha 2019 ne´e kompostu husi parte dader no lorokra´ik hamutuk graduadu na´in 834.
Jornalista : Nelia Fernandes
Editór : Rafy Belo
