QUELICAI, 19 dezembru 2019 (TATOLI) – Eskuadra Polísia Quelicai, Postu Administrativu Quelicai, Munisipiu Baucau, falta tebes ekipamentu liuliu rádiu komunikasaun, gás lakrimojéneu no aljema.
Tuir Komandante Eskuadra Polísia Quelicai, Inspetór Polísia Felix dos Santos, katak rádiu komunikasaun importante tebes atu membru sira halo komunikasaun, gás lakrimojéneu ne’e bele ajuda bainhira akontese kazu asaltu ruma.
“Hanesan foin lalais akontese iha suku Maluro iha loron 2 novembru 2019, no aljema (borgol) mós persiza tebes bainhira kaptura suspeitu barak. Se lae, bainhira kaptura suspeitu no la tau borgol entaun suspeitu bele halai filafali no difísil atu hetan solusaun ba problema ruma”, Felix afirma iha Postu Administrativu Quelicai, ohin.
Hodi dehan materiál ne’ebé importante liu maka gás lakrimojéneu para bele halo atuasaun atu bele hatún suspeitu sira-nia forsa. “Ida tan maka borgol, ami laiha ne’ebé kaer suspeitu la tau borgol, maibé suspeitu sira ne’e tanba koopera ho ami ne’ebé ami bolu la’o hamutuk, no mós rádiu komunikasaun laiha ne’ebé ami hotu uza telemovel privadu”, Inspetór Polísia Felix dos Santos haktuir.
Ekipamentu ne’ebé maka daudaun ne’e iha maka karreta patrullamentu ida, maibé kondisaun aat ona, motorizada no kilat, maibé kilat labele utiliza arbiru.
Aléinde ne’e, falta rekursu umanu, tanba membru Polísia iha eskuadra hamutuk 13 inklui komandante eskuadra.
“Hosi hirak ne’e, ema ne’ebé kondisaun di’ak ne’e ami na’in-neen de’it, sira seluk idade ona, no balu kondisaun liman tohar, ne’ebé ami-nia forsa ne’e aumenta tun, ne’ebé atu tun ba terrenu hodi asegura seguransa sai problema”, katak.
Tanba ne’e, autoridade seguransa ne’e husu Komandu Polísia Nasionál Timor-Leste (PNTL) atu aumenta membru Polísia iha eskuadra, no ideál liu to’o na’in-32, tanba área iha Quelicai luan no populasaun barak.
Entretantu, Felix informa krime ne’ebé rejista aas iha Eskuadra Polísia Quelicai mak violénsia doméstika no asaltu.
Jornalista : Antónia Gusmão
Editora : Maria Auxiliadora
