Ba Juventude Timor, Amu Belo Husu Hametin Unidade
DILI, 16 janeiru 2020 (TATOLI) – Laureadu Nobel ba Pás nian, Mgr. Carlos Filipe Ximenes Belo, SDB, husu ba juventude Timoroan hotu iha Timor laran tomak no iha rai li’ur atu hametin liu tan unidade nasionál no harii pás ba Timor.
Notísia Relevante : Amu Belo Konsidera Ukun-án Seidauk Muda Povu-nia Moris
Bispu Emeritus Dioseze Dili, Dom Carlos Filipe Ximenes Belo, SDB, hato’o mensajen ne’e husi sidade Lizboa, Portugal, iha ámbitu kongresu nasionál Konsellu Nasional Juventude Timor-Leste (CNJTL-sigla portugés), ohin, ne’ebé hala’o iha Centro Conveção Dili (CCD).
Amu Belo fó votu solidariedade ba joven sira no husu Na’in Maromak atu kongresu nasionál CNJTL nian ne’e la’o ho di’ak, liuliu fó inspirasaun atu oinsá bele estabelese baze konstrusaun iha TL.
“Imi ne’ebé mak tuir kongresu daudaun ne’e no ba sira ne’ebé namkari iha mundu no balu ne’ebé mak halo servisu ne’e katak aban bainrua imi mak substitui fali ami tanba agora idade hotu ona no imi mak kaer kuda talin ita-nia rain TL,” Amu Belo tenik.
Nia dehan, atu harii baze iha Timor mak baze dezenvolvimentu, baze sosiál no solidariedade no baze konstrusaun nian. Tanba ne’e, Amu Belo husu ba sira ne’ebé estuda no sira ne’ebé espíritu traballu ninian halo sakrifisiu hodi fó nia-an tomak no matenek atu harii rai Timor-Leste.
“Ha’u hato’o ba imi katak, ita-nia hanoin ne’e ba oin, labele hanoin katak harii Timor harii ho funu no hanoin fahe malu nian, maibé hanoin harii ho ulun ho neon no ho laran,” afirma Amu Belo.
Tuir Amu Belo, tempu mai ne’e tempu estudu nian. Tanba ema ne’ebé estuda badinas no matenek mak iha inovasaun no aban bainrua bele kontribui ba rai ida ne’e.
“Ita nia dezafiu prepara joven matenek no badinas iha siénsia teknolojia no domina área hotu, atu nune’e, bele konstrui ita-nia rain Timor. Nune’e, ha’u hato’o ba imi nafatin hamutuk atu kria unidade no kria pás. Enkoraja ba malu, simu malu hanesan maun-alin no laiha tan divizoens Lorosa’e- Loromonu, divizoens partidu, maibé hanoin ida, neon ba malu,” hateten Amu Belo hodi taka nia mensajen ba konferensista sira kongresu nasionál CNJTL nian.
Jornalista : Osória Marques
Editór : Francisco Simões
