Governu Prevee Rihun $ 250 Hakbi’it Ekonómia Feto
DILI, 17 janeiru 2020 (TATOLI)-Governu liuhosi Sekretáriu Estadu Igualdade no Inkluzaun (SEII) prevee ona $ 250.000 iha proposta orsamentu jerál estadu (OJE) 2020 hodi fó apoiu ba grupu feto no família vulneravel sira hodi hakbi’it ekonómia feto iha territóriu.
Sekretáriu Estadu, Maria José Fonseca Monteiro, informa polítika governu ne’e hodi hakbi’it atividade grupo feto, família vulnaravel sira hodi loke kioske, kuda modo, soru-tais, hakiak manu no seluk tan.
Notísia Relevante :Heineken-AEMTL Oferese Kioske Ba Feto Kbiit-La’ek Na’in-Hitu
Nune’e mós hodi fó apoiu ba organizasaun sosiedade sivíl sira ne’ebé mak presta servisu ba feto liliu iha área prevensaun ba violénsia hasoru feto no labarik feto.
“Tinan ne’e ita prevee $250.000 iha transferénsia públika, maibé ha’u rona nai deputadu sira iha komisaun atu koa item ne’e, tanba ne’e bainhira koa ita labele realiza programa hirak ne’e,”dehan Nia ba TATOLI, iha Parlamentu Nasionál, ohin.
Notísia Relevante :AFEDIL Preokupa Ekonomia La Suporta Feto
Tanba ne’e, governante ne’e husu ba deputadu iha uma fukun parlamentu atu tetu didi’ak antes halo redusaun ba item refere.
SEII sei apoiu orsamentu ba grupo benefisiáriu sira basea ba proposta ne’ebé maka sira hatama no hetan ona aprovasaun hosi ekipa tékniku SEII nian.
Tuir proposta OJE 2020, Sekretáriu Estadu Igualdade no Inkluzaun prevee millaun $ 1.786, aloka ba saláriu no vensimentu 584.000, bens servisu 923.000, transferénsia públika 250.000, kapitál menór $ 29.000, enkuantu kapitál dezenvolvimentu laiha.
Jornalista : Nelson de Sousa
Editór : Francisco Simões
