DILI, 27 janeiru 2020 (TATOLI) – Komisaun Asesu Ingresu Superiór (KAIS) aprezenta ona rezultadu ikus korresaun ba teste ne’ebé estudante ensinu sekundáriu finalista sira asesu atu tama ba ensinu superiór públiku, Universidade Nacional Timor-Lorosa’e (UNTL).
“Ohin, KAES hato’o ona rezultadu husi prosesu ingresu mai MESSK. Maibé, ha’u seidauk bele informa ninia rezultadu detalladu tanba sei iha tan prosesu balun mak ha’u presiza halo ho liña instituisaun relevante sira,” Ministru Ensinu Superiór Siénsia no Kultura (MESSK), Longuinhos dos Santos ba jornalista sira iha salaun enkontru MESSK, Colmera, ohin.
Tuir nia katak molok atu publika rezultadu prosesu ingresu ne’e presiza halo uluk enkontru ho liña instituiusan sira ne’ebé relevante ho prosesu ne’e tanba sira presija hetan informasaun antes rezultadu ne’e fó sai. Tan ne’e, nia rasik seidauk determina bainhira mak sei realiza enkontru ne’e.
“Maibé, ha’u sei halo tan enkontru ida ho liña instituisaun sira hanesan Sekretáriu Estadu Asuntu Veteranus, liuhusi Komisaun Omenajen, Sekretáriu Estadu Juventude Desportu, Asosiasaun Defisiente, FALINTIL-Forsa Defeza Timor-Leste, no Polísia Nasionál Timor-Leste”.
Rejultadu ne’ebé mak iha ona Ministeriu nia liman, tuir governante ne’e sei asegura hodi hein tempu ne’ebé sufisiente depois mak termina atu konvoka enkontru hodi anunsia rezultadu finál ba públiku.
Notísia relevante:Prosesu Ingresu Kandidatu Estudante Ba UNTL Kompeténsia MESSK
Jornalista : Tomé Amado
Editór : Rafy Belo
