Verifikasaun Lista Naran Veteranu Pendente
DILI, 31 janeiru 2020 (TATOLI)-Sekretáriu Estadu Sekretáriu Estadu Antigu Kombatente no Libertasaun Nasionál (SEACLN) Gil da Costa ‘Oan Soro’ informa, verifikasaun lista naran veteranu ne’ebé rejista iha segundu periodu sei pendente hodi hein Orsamentu Jerál Estadu (OJE) aprovadu ou hein ba governasaun foun.
Notísia relevante : Benefisiáriu 28.558 maka Simu ona Pensaun Veteranu
“Ita he’in. Depende orsamentu aprova ou karik husik governu foun ida mai fali bele kontinua ba verifikasaun lista naran veteranu ne’ebé iha tinan kotuk fó sai,’’ tenik Gil Oan Soro, hodi responde Ajénsia TATOLI iha servisu fatin, Caicoli Dili, kinta (30/01/2020).
Iha tinan 2019, SEACLN liu husi Komisaun Omenajen públika ona lista naran benefisiáriu veteranu rejistadu iha segundu periodu hamutuk 124.675 iha territóriu laran tomak.
Durante fulan outubru no dezembru 2019 prosesu verifikasaun iha munisípiu, postu no suku konsege verifika ona ema rihun 14-resin. Husi númeru ne’e sei falta barak tebes seidauk verifika, tanba hein hela orsamentu la’o normal hodi bele kontinua.
Sekretáriu Estadu Gil da Costa ‘Oan Soro’ hateten, ho verifikasaun ne’ebé governu hala’o hotu sei re-verifika fila-fali tan tuir prosesu hirak ne’ebé estabelese hafoin justifika ema ne’e partisipa duni iha prosesu funu ba libertasaun nasionál.
Notísia Relevante : SEACLN Esklarese Governu Ko’a Veteranu Nia Osan $30.00
Jornalista : Nelson de Sousa
Editór : Francisco Simões
