DILI, 04 fevereiru 2020 (TATOLI) – Governu liuhusi Ministériu Agrikultura no Peska (MAP) iha Diresaun Jerál Floresta hala’o konservasaun florestál iha area protejida 44 inklui parke nasionál rua.
Diretór Jerál Floresta, Raimundo Mau, informa área protejida ne’ebé identifikadu iha parte terrestre iha 44 inklui Parke Nasionál Nino Konis Santana no Kay Rala Xanana Gusmão, no iha parte mariña iha área protejida hamutuk 2, maibé seidauk inklui iha lista dekretu lei área protejida.
“Ita-nia polítika florestál atu fó mós atensaun ba iha konservasaun florestál katak ita sei proteje, atensaun ba iha restu ai-laran sira ne’ebé maka eziste nanis, ai-laran tuan sira ne’e maka ita uza hanesan sasukat hodi determina sira hanesan área protejida”, Raimundo Mau ba TATOLI hafoin hala’o intervensaun iha eventu aprendizajen ida kona-ba Agrikultór Maneja Rejenerasaun Naturál (FMNR), realiza hosi World Vision iha Salaun Sentru Juvenil Padre António Vieira, Taibessi, ohin.
Raimundo Mau hatutan área protejida tuir lei katak área ida ne’ebé maka tenke hetan tratamentu, protesaun tanba ninia ezisténsia hosi ai-laran tuan.
“Ita hatene katak ai-laran ne’ebé maka tuan, ai-laran ne’ebé maka di’ak sai mós uma ba iha kriatura sira seluk, sai mós uma ba iha balada no mós biodiversidade sira ne’ebé maka pertense mós ba ita-nia rikusoin”, nia dehan.
Relasaun ho sunu rai arbiru, Diretór Jerál ne’e dehan, sira hato’o informasaun liuhusi autoridade lokál hodi apela ba to’os-na’in sira, bainhira sunu ahi iha to’os tenke ho responsabilidade, kuidadu atu ahi ne’e labele da’et ba área ne’ebé maka lasai ita-nia alvu.
“Sunu de’it ba iha área ne’ebé maka prepara atu kuda rai, maibé buka atu hatene didi’ak katak loro-kraik ou rai-kalan mak sunu fo’er sira iha to’os tenke iha tempu ida ne’ebé anin labele boot, nune’e labele lori fali ahi-klaak bá tun filafali área ne’ebé maka ita laiha interese atu sunu, entaun ahi han ita labele kontrola”, katak.
Notísia relevante : Sidadaun Hotu Tenke Sai Protetór ba Floresta
Jornalista : Antónia Gusmão
Editora : Maria Auxiliadora
