Xanana Kontinua Konvense Indonézia Atu Rezolve Isu Fronteira Terrestre
DILI, 04 fevereiru 2020 (TATOLI) – Xefe Negosiadór Prinsipál ba asuntu Fronteira nian, Kay Rala Xanana Gusmão, tersa (04/02/2020), halo vizita kordiál ida iha Jakarta, Indonézia, hodi hasoru malu ho Ministru Koordenadór ba asuntu Polítika no Lei Indonézia nian, Mahfud MD ho Ministra Negósiu Estranjeiru, Retno Lestari Priansari Marsudi, hodi ko’alia ba malu kona-ba isu fronteira rai maran (terrestre) entre Timor-Leste ho Repúblika Indonézia.
Notísia Relevante : Finaliza Tiha Akordu Fronteira Terrestre, TL-RI Kontinua Ba Diskusaun Fronteira Marítima
Iha hasoru malu entre parte sira ne’e akompaña mós husi Embaixadór Timor-Leste nian iha Indonézia, Alberto X.P. Carlos ho Diretór Jenerál Ázia Pasífiku no Afrika, Ministériu Negósiu Estranjeiru Indonézia nian, Desra Percaya.
Embaixadór Alberto X.P. Carlos, informa ba Ajénsia TATOLI, ohin, via WhatsApp katak, hasoru malu entre Xanana Gusmão ho ministru kompetente sira iha Jakarta hatudu sinál ida pozitivu tebes atu Timor-Leste ho Indonézia tuur hamutuk solusiona problema pendente sira hanesan diskusaun isu fronteira terrestre nian.
Ministru Mahfud MD mós iha esperansa boot atu iha solusaun ida di’ak ba Timor-Leste ho Indonézia kona-ba fronteira terrestre ne’ebé to’o ohin loron seidauk hetan ninia klaridade.
Notísia Relevante : Negosiasaun Fronteira Terrestre TL-RI Sei Sai Ezemplár Ba Mundu
Informasaun seluk ne’ebé relata husi Ministériu Negósiu Estranjeiru Indonézia nian liu husi Diretór Jenerál Ázia Pasífiku no Afrika, Desra Percaya, ba mídia lokál sira Indonézia nian katak, pontu prinsipál fronteira terrestre entre TL-RI seidauk rezolve mak fronteira terrestre iha Noel Besi, Citrana ho Sunan Bijael Oben.
Nia hatutan, Timor-Leste ho Indonézia seidauk to’o iha akórdaun ida kona-ba isu fronteira terrestre, liuliu fatin sira iha Noel Besi, Citrana ho Sunan Bijael Oben, tanba ne’e presiza iha negosiasaun.
Liu husi enkontru kordiál ne’e, Xanana ho nai ulun sira Indonéziu nian mós iha ona konkordánsia preliminaria balun atu rezolve isu fronteira terrestre liuhusi meiu polítika, katak la’ós ona tuir kanál diplomasia.
Notísia Relevante : Austrália Fiar TL no Indonézia Sei Solusiona Fronteira Terrestre
Jornalista : Francisco Simões
Editór : Xisto Freitas
