DILI, 05 fevereiru 2020 (TATOLI) -Polisia Munisipiu Dili ezekuta mandadu detesaun husi Ministériu Públiku hodi detein oan mane na’in rua ho mane foun ida ne’ebé trata sira nia aman la ho dignu hodi sulan iha besi ne’ebé sira solda metin atu hanesan “manu luhan”.
Suspeitu na’in tolu solda besi metin atu hanesan manu luhan sulan tama sira nia aman Manuel Costa da Crus (75) tanba de’it dehan, sira nia aman ne’e moras mental.
Mandadu detensaun ba suspeitu na’in tolu ne’e ho númeru NUK 0052/20/DLCMR, ohin, tuku 9:45 Otl, PNTL Munisípiu Dili, ezekuta hodi ba halo detensaun ba suspeitu sira ne’ebé hela iha Aldeia Avansa, Suku Bairru-Pité, Postu Administrativu Don Aleixo, Munisípiu Dili.
Antes ne’e, públiku sira hato’o ona keixa ba polisia hodi lamenta atitude suspeitu na’in tolu ne’e ho inisiál, JS, MPDC no MPDC sulan sira nia aman durante fulan ida ona.
Segundu Komandante Polisia Munisipiu Dili, Superintendente Xefe, Euclides Belo dehan, atitude suspeitu na’in tolu komete krime, nune’e parte Investigasaun Kriminál sei halo investigasaun kle’an foin aprezenta kazu ne’e ba Ministériu Públiku.
“Ita sei prosesa kazu ne’e tuir lei, tanba sira komete krime,” hateten Euclides Belo ba jornalista sira.
Nia dehan, asaun ne’ebé suspeita sira halo nu’udar violasaun direitu umanu kontra lei no la trata sira nia aman hanesan umanu, mezmu sira nia aman sofre moras mentál.
Vítima rasik parte Polisia lori ona ba Ospitál Nasionál Guido Valadares hodi hala’o tratamentu saúde.
Ajénsia TATOLI tenta konfirma asuntu ne’e ho suspeitu na’in tolu iha Komandu Polisia Munisípiu Dili, maibé parte suspeita seidauk bele fó klarifikasaun, tanba sei submete ba prosesu investigasaun.
Jornalista : Eugénio Pereira
Editór : Francisco Simões
