DILI, 19 fevereiru 2020 (TATOLI)–Tribunál Distritál Dili (TDD) liuhosi kontinuasaun julgamentu primeiru interrogatóriu, ohin, aplika medida koasaun prizaun preventiva ba arguidu na’in-rua ho inisiál AP ho MS.
Notísia Relevante : Taa Malu iha Hera, Na’in-rua Kanek
Ba arguidu na’in-neen (6) seluk, hanesan AR, MDS, CDA, DN, DS, AS, Tribunal aplika ho termu identidade rezidénsia (TIR) no ba arguidu JP hetan liberta imediatamente tanba menór idade.
Arguidu na’in-sia ne’e (9) deskonfia envolve iha kazu asaltu no taa aman ho oan iha Aldeia Hali Dolar, Suku Hera, Postu Administrativu Kristu Rei, Munisípiu Dili, sábadu kalan (15/02/2020).
Defeza Gil Amaral ne’ebé fó asisténsia ba arguidu sira esplika, razaun TDD aplika koasaun prizaun preventiva ba nia kliente na’in-rua ne’e tanba tribunál fó razaun katak iha testemuña balun no vítima mak temi direta arguidu na’in-rua nia naran.
Razaun seluk, bazeia ba artigu 183 bainhira arguidu sira sai ho lezadu hanesan viziñu bele hamosu perturba tan krime foun.
Defeza Gil Amaral, la konkorda ho aplikasaun ne’e ba nia kliente tanba deklarasaun arguidu sira no iha testemuña ne’ebé forte la hatene buat ida kona-ba kazu ne’e.
“Kona-ba katana ne’ebé raan iha ba depois prosesu investigasaun la’o iha polísia, maibé momentu ne’ebá polísia baku arguidu nia raan sai foin katana hodi kose ba arguidu,” Gil Amaral haktuir.
Arguidu sira-ne’ e mós hetan baku hosi membru Polísia Investigasaun Kriminál to’o balun kanek raan sai. Tanba ne’e, nia dehan, iha tempu badak sei hatama keixa ba Ministeriu Públiku ho Provedoria Direitu Umanu no Justisa (PDHJ-sigla Portugés) kona-ba aktu ne’ebé mak membru polísia sira halo ba nia kliente.
Nia mós sei halo rekursu ba desizaun tribunál nian ne’ebé aplika medida koasaun prizaun preventiva ba nia kliente na’in-rua iha primeira instánsia durante loron 15.
Audiénsia primeira interrogatóriu ne’e prezide hosi juíz singulár Maria Solana, parte Ministériu Públiku reprezenta hosi Prokuradór Cláudio do Rosário, no arguidu sira hetan asisténsia legál hosi Defensór Públiku, Gil Amaral.
Jornalista : Nelson de Sousa
Editór : Francisco Simões
