DILI, 20 fevereiru 2020 (TATOLI)-Jestór Klínika Bairro-Pité Dili, Inácio dos Santos, akompaña hosi Diretór Daniel Murpy, kinta ohin hasoru malu ho Primeiru-Ministru, Taur Matan Ruak hodi relata kona-ba problema menus orsamentu ba funsionamentu Klínika ne’e durante tinan 2020.
Inácio dos Santos informa iha tinan 2019 liubá, Gabinete Primeiru-Ministru liuhosi fundu apoiu sosiadade sivíl apoiu osan hamutuk $ 83.000 ba Klínika Bairro-Pité.
Notísia Relevante :Klínika Bairru-Pité Konsulta Pasiente Ida Kontribui $1
Maibé, iha tinan ne’e, seidauk hetan apoiu orsamentu hosi Governu tanba ne’e OJE 2020 sumba iha Parlamentu Nasionál.
“Entaun, tinan kotuk ami halo proposta ba Ministériu Saúde atu aloka orsamentu ba klínika Bairro- Pité maibé Ministériu Saúde tau duni orsamentu hamutuk rihun $180 to’o ikus orsamentu ba tinan ida-ne’e xumba iha Parlamentu Nasionál entaun ba Klínika Bairro-Pité laiha,” katak Jestór ne’e ba jornalista sira iha Palásiu Governu, Dili, ohin.
Notísia Relevante :Sentavus ba Klínika Bairu Pité
Durante fulan-janeiru liubá Klínika Bairro-Pité hasoru hela krize finanseira tanba ne’e nia parte obrigadu tenke husu kontribuisaun hosi pasiente tenke selu másimu $1.00.
Iha enkontru ne’e, PM Taur Matan Ruak seidauk fó sinál atu apoiu orsamentu ba funsionamentu Klínika Bairro-Pité tanba Governu Daualuk oras ne’e sustenta mákina Estadu ho osan duodésimu kada fulan.
Notísia Relevante :SOLIDÁRIU SENTAVUS LIMA SALVA POVU NIA VIDA
Mezmu nune’e, Taur Matan Ruak ho ninia ekipa sei buka meiu atu oinsá bele fó apoiu ba klínika Bairro-Pité ne’ebé funda hosi Doutór Daniel Murpy. “Primeiru-Ministru rasik dehan labele promete no buka sosulsaun de’it,” nia hateten.
Notísia Relevante :Klínika Bairru Pité Hahú Taka Uluk Sala Baixa no Maternidade
Jornalista : Felicidade Ximenes
Editór : Agapito dos Santos
