ATAMBUA, 21 fevereiru 2020 (TATOLI) – Konsuladu Timor-Leste ba Kupang Indonézia, Jesuíno dos Reis Matos “Zito” husu ba Timoroan bainhira hala’o vizita privadu no servisu tama ba Atambua no Kupang tenke lori dokumentu kompletu, inklui renova pasaporte manuál ba pasaporte eletrónika hodi labele afeta ba sidadaun sira nia viajen.
Konsuladu Zito informa, sistema servisu migrasaun Indonézia muda ona sistema servisu eletrónika hodi kontrola pasaporte, inklui dokumentu kualkér transporte ne’ebé tama ba área Indonézia tenke kompleta.
“Ami rekomenda ba ita nia sidadaun hotu- hotu, se bele karik atu mai ema nia rain tenke hatene regra no lei Indonézia nian. Sidadaun hotu-hotu mai tenke haree didi’ak dokumentu viajen liu-liu pasaporte tenke renova ba eletrónika tama fronteira tenke tau vistu ho didi’ak inklui lori transporte tenke kompleta dokumentu sira para labele mosu problema,” hateten Konsuladu Zito “Matos” ba Ajénsia Tatoli iha Konsuladu Atambua-Indonézia, kinta (20/02/2020).
Durante ne’e konsuladu rejista kazu barak liu maka Timoroan sira halo viajen ba Indonézia uza pasaporte manuál no dala ruma data válidu pasaporte mate migrasaun Indonézia bele prende no husu selu multa.
“Se sidadaun sira mai lori pasaporte manuál dala ruma bele mosu problema bainhira migrasaun halo pasa revista dokumentu sira,” nia apela.
Ba estudante Timoroan sira, nia husu, bainhira atu ba eskola tenke trata dokumentu sira hanesan KITAS inklui karta koñesimentu legál husi Ministériu Edukasaun Timor-Leste atu labele prezudika ba estudante sira nia estudu.
Iha parte seluk, Konsuladu ne’e alerta ba membru governu ho funsionáriu sira inklui deputadu parlamentu sira bainhira atu halo vizita ba Oe-Cusse liu fronteira terrestre, Batugadé, Covalima no Oe-Cusse tenke hato’o karta koñesimentu ba Ministériu Negósiu Estranjeiru no Kooperasaun (MNEK) para fó xamada ba protokolu sira iha Atambua bele halo fasilita prosesu ho autoridade migrasaun no polisia Indonézia hodi akompaña kualkér viajen labele mosu problema iha dalan.
“Ba membru governu no deputadu no ONG, se ita boot sira atu halo viajen mai Oe-Cusse, Kupang no Atambua tenke hato’o karta koñesimentu semana ida antes mai para ita nia protokolu sira bele trata dokumentu hodi fasilita viajen labele mosu problema,” nia hatete.
Nia husu mós ba Servisu Migrasaun, Alfándega Timor-Leste no Unidade Patrullamentu Fronteira (UPF) iha postu integradu Mota Masi, Batugadé no Oe-Cusse, bainhira prende sasán kontra bandu inklui karreta no motór ilegál husi Indonézia tama ba Timor-Leste tenke hato’o mós informasaun ba konsuladu sira bele iha koñesimentu.
Iha parte seluk, Konsuladu Zito preokupa dala barak Timoroan sira vizita ba la fó koñesimentu ba konsuladu, bainhira mosu problema mak foin buka konsuladu rezolve problema presiza lori tempu.
Kona-ba dadus estudante Timoroan hira ba hala’o estudu iha Kupang no Atambua, Konsuladu Zito dehan ,too agora sira seidauk iha baze dadus klaru, tanba Timoroan ba eskola balun la fó koñesimentu.
Nu’udar konsuladu foun, Zito promete sei koordena ho Konsuladu Timor-Leste ba Atambua, João Simão Sousa no Embaixadór Timor-Leste ba Jakarta Indonézia no Konsuladu Timor-Leste iha Bali koopera ho Ministériu Edukasaun Timor-Leste hodi kria baze dadus para halo rejistu ba estudante sira.
Jornalista : Eugénio Pereira
Editór : Francisco Simões
