DILI, 27 fevereiru 2020 (TATOLI)-Reitór Universidade da Paz (UNPAZ), Adolmando Amaral informa UNPAZ hamenus ona kuríkulu hosi 213 tun ba 165 ho objetivu atu reforsa kualidade edukasaun ba prosesu aprendijazen estudante sira.
Nia dehan Lisensiadu UNPAZ barak maka durante ne’e hasoru problema manajeriál iha sira-nia servisu fatin tanba aprende teória barakliu durante prosesu aprendijazen iha banku universidade duké prátika.
Tuir nia ho redusaun kuríkulu ne’e, UNPAZ sei reforsa liután iha prátika liliu kapasitasaun no formasaun espesífiku ba estudante sira.
“Kompoténsia sira ne’e mak koñesimentu, abilidade no atetude. Ita tenke dezenvolve matéria sira ne’e hodi prepara estudante sira depois termina sira-nia estudu hodi kompete iha merkadu traballo,” dehan Magnifiku Reitór, Adolmando Amaral ba TATOLI iha ninia servisu fatin UNPAZ, Dili, kinta (27/02/2020).
Adolmando espera ho redusaun kuríkulu ne’e sei prodúz joven Timoroan ho kualidade hodi apoiu prosesu dezenvolvimentu.
“Ita la hatene tinan 10 ba oin bainhira ita dezenvolve ona bele iha ema ne’ebé espertu iha área oioin atu nune’e bele responde ba nesesidade merkadu nian,”nia realsa tan.
Jornalista : Tomé Amado
Editór : Agapito dos Santos
