DILI, 28 fevereiru 2020 (TATOLI)-Ministra Edukasaun Juventude no Desportu (MEJD), Dulce de Jesus Soares, apela ba estudante no Profesór sira hosi eskola Sekundáriu FINANTIL ho 10 de dezembru Comoro Dili, atu kontinua mantein páz no hakmatek hodi apoiu prosesu aprendijazen.
Ministra Dulce hato’o pedidu ne’e relasiona ho kazu konflitu ne’ebé akontese entre estudante eskola sekundáriu rua ne’e, iha loron tersa (25/02/2020)hodi resulta estudante na’in tolu hetan kanek.
Notísia Relevante :PNTL Detein Estudante Eskola 10 Dezembru Na’in 22
“Husu sira atu kontinua mantein paz no establidade iha sira-nia eskola rasik. Ida ne’e responsavel dirigente eskola rua nian,tanba estudante sira mesak joven de’it persija hatene regras no disiplina sira,”katak, Ministra Dulce de Juses Soares ba jornalista sira ohin, iha edifísiu MEJD, Villa-Verde Dili.
Governante ne’e informa dadaun ne’e bolu ona Dirijente no Reprezentante Asosiasaun Estudantíl hosi Eskola FINANTIL ho 10 de dezembru hodi buka solusaun ba kazu ne’e atu labele repete tan iha futuru.
Nune’e mós hosi parte Ministériu Edukasaun Juventude no Desportu sei delega dirijente balun atu koa’lia no rona diretamente hanoin balun hosi estudante eskola rua hodi buka rezolve konflitu ne’ebé maka mosu.
Jornalista : Tomé Amado
Editór : Agapito dos Santos