DILI, 04 marsu 2020 (TATOLI) – Diretór Jerál Autoridade Aduaneira (AA)/Alfándega, José António Abílio, informa ekipa Alfándega halo apreensaun ba Manu-Futu husi Rejiaun Administrativa Espesiál Oé-Cusse Ambeno (RAEOA), bazeia ba informasaun husi intelijénsia ne’ebé serbisu hamutuk ho AA.
Diretór AA informa kestaun ne’e relasiona ho operasaun ne’ebé hala’o husi ekipa Alfándega iha madrugada 29 fevereiru no halo apreensaun ba Manu-Futu hamutuk 124 iha Portu Dili, tanba deskonfia mai husi Indonézia, maibé tanba konsidera hanesan sasan agríkola, daudaun ne’e asegura hela iha Diresaun Nasionál Kuarentena no Bioseguransa Ministériu Agrikultura no Peska (MAP) iha Aeroporto Comoro.
“Ami hetan informasaun hosi ami-nia servisu intelijénsia. Ami-nia intelijénsia ne’e la’ós iha Timór de’it maibé ami iha ligasaun ho Alfándega Indonézia ne’ebé ami sempre troka informasaun ba malu, kuandu iha informasaun ne’ebé maka tama relasaun ho atividade ilegál sira sempre informa mai ami. Tanba ne’e, bazeia ba informasaun hosi intelijénsia maka ami halo apreensaun”, tenik Diretór José António ba Agência TATOLI iha ninia knaar fatin, Palásiu Governu, kuarta ne’e.
Notísia Relevante: Kuarentena Asegura Ona Manu-Futu Husi Oé-Cusse Ne’ebé Alfándega Halo Apreensaun
Nia afirma, AA rasik iha diresaun ida hodi kontrola sasan illegál, tan ne’e liuhosi operasaun konjunta maka hetan Manu-Futu ne’ebé maka tama sein dokumentu.
“Relasiona ho manu ne’ebé mak halo apreensaun, Alfándega iha diresaun risku atu halo kontrolu kona-ba atividade ilegál, ne’ebé ho operasaun konjunta momentu halo iha patrullamentu no operasaun sira konsege hetan duni katak iha importasaun manu ne’ebé mak tama mai no laiha dokumentu. Kuandu laiha dokumentu Alfándega halo apreensaun, tanba merkadoria saida de’it mak tama mai, primeira pessoa halo inspesaun maka Alfándega, halo tiha inspesaun no haree tiha dokumentu iha ka laiha maka entrega ba Kuarentena”, nia akresenta.
Hafoin Alfándega halo apreensaun no haree dokumentu hotu, tanba sasan ne’e kompeténsia Kuaretena nian entaun halo auto-notísia ida hodi entrega ba Kuarentena.
“Tanba ne’e manu entaun kompeteténsia Kuaretena nian hodi haree manu ne’e bele lori tama ka lae, iha autorizasaun ka lae, Kuarentena maka tenke fó lisensa antes manu ne’e tama. Tanba ne’e daudaun ne’e iha ona Kuarentena, ne’ebé ami hein atu hato’o fali informasaun mai ami ka atu halo partisipasaun ba Ministériu Públiku ne’e depende ba Kuarentena”, nia afirma.
Jornalista: Antónia Gusmão
Editora: Julia Chatarina
