DILI, 10 marsu 2020 (TATOLI)—Parlamentu Nasionál (PN) hein Governu submete pedidu levantamentu fundu minarai tanba orsamentu duodésimu atu finánsia mákina Estadu iha fulan-abríl la sufisiente.
“Ita-nia saldu la to’o ona hodi finánsia orsamentu duodésimu ba fulan-abríl nian. Tanba ne’e mak Parlamentu hein Governu submete pedidu ida mai atu Parlamentu autoriza hodi halo levantamentu. Parlamentu prontu no ami sei fó prioridade ba ida-ne’e tanba impaktu ba interese nasionál ba órgaun Estadu nia funsionamentu,” dehan Prezidente Parlamentu Nasionál, Arão Noé de Jesus da Coata Amaral, iha Parlamentu Nasionál, segunda ne’e.
Prezidente Parlamentu Nasionál ko’alia asuntu ne’e tanba iha semana kotuk, Ministra Finansa Ein-ezersísiu, Sara Lobo, fó-sai katak orsamentu duodésimu la sufisiente ona atu finánsia mákina Estadu iha fulan-abríl.
Arão Noé fiar bankada Parlamentár sira sei fó importánsia tanba ida-ne’e liga ho vida nasaun nian.
“Governu sente orsamentu duodésimu la sufisiente, ha’u sei tau ida-ne’e ho karáter urjénsia nune’e aprova lalais molok meadu marsu. Nune’e, Governu bele iha autorizasaun ona no depois Prezidente Repúblika promulga. Governu bele halo levantamentu hosi fundu atu kobre orsamentu duodésimu ba fulan-abríl nian,” nia hateten.
Prezidente Parlamentu ne’e fó-sai, katak autorizasaun Parlamentu nian tenke liuhosi asaun ida votasaun no aprovasaun iha plenária.
Nia dehan, montante orsamentu ne’e depende ba Governu nia kalkulasaun, tanba daudaun ne’e millaun $116 finánsia duodésimu ba fulan-ida hodi hein aprovasaun Orsamentu Jerál Estadu.
“Tuir lei, dalan seluk labele (governu foti direta). Se di’akliu, ita kumpre regra ne’ebé iha tanba Lei Jestaun Finanseira no Lei Fundu Petrolíferu hateten só liuhosi Orsamentu Jerál Estadu ho autorizasaun Parlamentu ninian,” nia argumenta.
Nia subliña, bainhira Governu aprezenta proposta lei tenke hetan promulgasaun hosi Prezidente Repúblika foin vigora no fó dalan ba Governu halo levantamentu.
“Se Governu hakarak halo levantamentu, ha’u husu Governu aprezenta ona proposta lei ida mai nune’e ita presiza molok fulan-ida Parlamentu bele aprova ona. Ida-ne’e la xumba, tanba ne’e interese nasionál. Se xumba orsamentu laiha no Estadu labele funsiona,” Prezidente Parlamentu Nasionál hateten.
Jornalista : Evaristo Soares Martins
Editór : Cancio Xiemenes
