ERMERA, 14 marsu 2020 (TATOLI) – Emprezáriu timoroan, Oscar Lima, iha sábadu ne’e simu pose nu’udar Prezidente Fundasaun Kafé Letefoho, Atsabe, Hatolia, Ermera no Railaco (LAHER) ba períodu tinan lima husi 2020 to’o 2025.
Kafé LAHER ninia fundadór maka Ermera-oan sira, ne’ebé hetan apoiu husi autoridade suku 53 inklui komunidade Ermera rasik no Kafé LAHER signifika mai husi komunidade Postu Administrativu lima.
Objetivu prinsipál husi ezisténsia Kafé LAHER maka atu kontribui hanoin konstrutivu hodi dezenvolve di’ak liután Munisípiu Ermera, Postu Administrativu lima inklui suku 53 iha munisípiu ne’e, liuliu atu esplora no dezenvolve di’ak liután setór sira hanesan agrikultura, edukasaun no área potensiál sira seluk ne’ebé iha Ermera, nune’e povu Ermera bele sente prósperu ba futuru mai.
Hafoin simu pose Prezidente Fundasaun, Oscar Lima hateten durante tinan-lima iha ninia mandatu, nia sei servisu hamutuk ho parte hotu hodi bele dezenvolve setór potensiál iha Munisípiu Ermera.
“Planu prioridade ida maka halo diverifiksaun no dezenvolve agrikultura kafé no hadi’a kualidade kafé nian, foka ba dezenvolvimentu setór edukasaun hodi hasa’e kualidade di’ak liután ba East Timor Coffee Institute (ETCI) nian, no oinsá hakbiit kapasidade iha ETCI nian no dezenvolve setór agrikultura kafé no halo diversifikasaun ba produtu potensiál iha Munisípiu Ermera rasik”, nia realsa Prezidente Kafé Laher hafoin simu pose iha Ermera, sábadu ne’e.
Tanba ne’e, ho Ermera-oan sira hotu hamutuk harii ETCI tanba daudaun institutu ne’e komesa rekoñesidu ona hanesan instituisaun ida.
“Agora kafé iha tempu ne’ebé maka atu mate ba bebeik, entaun ami sei buka maneira atu bele husu apoiu ba Governu, institusaun no organizasaun boot sira atubele fó apoiu mós ba diversifikasaun no dezenvolve kafé iha Ermera”, realsa Oscar Lima.
Nune’e, nia promete sei tau importánsia hodi dezenvolve no diverifika setór agrikultura seluk iha Munisípiu Ermera rasik tanba munisípiu ne’e iha produtu potensiál barak la’os de’it kafé.
Durante ninia mandatu, nia husu Ermera-oan sira husi entidade hotu iha Postu Administrativu lima iha Ermera hamutuk ho komunidade sira no Prezidente Autoridade tenke suporta no kolabora di’ak ho nia.
“Ha’u sei la mesak, ha’u sei hamutuk ho ita bo’ot sira la’o ba oin nafatin tanba tempu ona ita Ermera-oan afirma ho lian ida de’it hamutuk dezenvolve Ermera liuhosi ita-nia atus sira ne’ebé ita halo hodi tau hanoin hamutuk ba dezenvolvimentu Ermera nian”, nia adianta.
Iha fatin hanesan, Prezidente Autoridade Munisípiu Ermera, José Soares, rekoñese estabelesimentu fundansaun Kafé Laher nu’udar inisiativa di’ak husi Ermera-oan sira katak tempu ona parte hotu servisu hamutuk sai ida de’it, nune’e bele dezenvolve ba indentifikasaun potensialidade iha Munisípiu Ermera.
Nia observa, dalabarak ema Ermera koñesidu ho kafé tanba ne’e presiza hamutuk hodi diversifika produtu sira ne’e diak liután.
“Nu’udar Prezidente Munisípiu Ermera, ha’u konfia estrutura foun fundasaun kafé Laher nian no fiar sira sei kumpre ho lideransa Oscar no kumpre promesa ne’ebé dehan ona”, nia akresenta.
Reitór ETCI, Lúcio Marçal Gomes, hateten ho estrutura foun bele halo di’ak liu sira ne’ebé servisu hosi kontribui dezevolvimentu jerál ba Timor-Leste, liuliu dezenvolve iha Ermera.
“Ho prezidente foun ninia prezensa, nia sei hadi’a buat balun iha área edukasaun liuliu iha ETCI rasik no bele dezenvolve di’ak liután setór seluk hanesan agrikultura”, nia salienta.
Nia refere kona-ba edukasaun iha Ermera, iha ETCI ne’ebé servisu hamutuk ho Prezidente Kafé LAHER atu halo traformasaun ba fasilidade institusaun nian balun ne’ebé maka seidauk kompletu.
“Ami-nian esperansa katak ho prezidente foun ninia presenza hamutuk ho ami ne’e foku ba infraestrutura no rekursu umanu, no sei haruka sira ne’ebé ramata universidade ona atubele prense rekezitus husi ensinu superiór”, subliña Lúcio.
Fundasaun LAHER harii iha 5 janeiru 2003 iha Ermera, Suku Poetete ho ninia fundadór iha tempu ne’ebá na’in-37, ne’ebé kompostu husi intektuál Ermera-oan hotu momentu ne’ebá hamutuk líder komunitáriu, no Veteranu Ermera sira.
Iha seremónia simu pose ba Prezidente Fundasaun Kafé Laher rasik, liuhosi okaziaun ETCI rasik asina akordu ho Timor Global ba kapasitasaun no hakbiit koñesimentu iha área kafé nian
Seremónia ne’e konta ho partisipasaun autoridade lokál sira, Vise-Prezidente CCI-TL inklui Prezidente CCI-TL Ermera, Korpu Diplomátiku balun no entidade sira seluk, estudante ETCI inklui komunidade Ermera sira.
Iha biban ne’e rasik, animu espozisaun produtu ne’ebé aprezenta husi eis estudante ETCI rasik.
Jornalista : Natalino Costa
Editora: Julia Chatarina
