DILI, 04 maiu 2020 (TATOLI)—Bankada Parlamentár kompostu hosi Partidu Libertasaun Populár (PLP), Kmanek Haburas Unidade Nasionál Timor Oan (KHUNTO) no Frente Revolusionária Timor-Leste Independente (FRETILIN) sei hatama pedidu destituisaun hasoru kompozisaun meza atuál.Kompozisaun meza atuál mak hanesan Prezidente Parlamentu Nasionál (PPN), Arão Noé de Jesus da Costa Amaral hosi CNRT, Vise-Prezidente PN, Maria Angelina Sarmento Lopez hosi PLP, Segundu Vise PN, Luís Roberto, Sekretária Meza PN, Maria Terezinha Viegas hosi CNRT no sekretária seluk hosi UDT/FM no PLP.
“Sei bá iha ne’ebá. Mosaun destituisaun tenke iha hodi fó apoiu ba VIII Governu. Tenke iha mudansa iha meza Parlamentu nian. Semana ida-ne’e ita aprezenta ona mosaun destuituisaun ba Meza Parlamentu Nasionál nian. Buat sira-ne’e halo tanba postura polítika muda. Destituisaun ne’e fásil loos. Halo de’it abaixo asinadu, aban aprezenta ba Prezidente Parlamentu Nasionál”, Vise-Xefe Bankada Parlamentár PLP, Deputadu Francisco de Vasconcelos, informa ba jornalista sira, iha Parlamentu Nasionál, segunda ne’e.
Vise-Xefe Bankada PLP ne’e fó-sai katak deputadu na’in-10 hosi bankada FRETILIN, PLP no KHUNTO mak sei asina pedidu ne’e hodi aprezenta ba Prezidente Parlamentu Nasionál, Arão Noé de Jesus da Costa Amaral.
“Ejizénsia polítiku mak obriga tenke halo, rejimentu Parlamentu hateten Prezidente Parlamentu Nasionál bele renúnsia nia mandatu. Ida seluk mak liuhosi mosaun destituisaun ne’e. Ha’u haree ohin mós plenária laiha ajenda entaun sinál ladi’ak”, Vise-Xefe Bankada PLP ne’e hateten.
Nia haktuir, ajenda iha semana kotuk iha maibé Prezidente Parlamentu Nasionál kansela ajenda ba plenária ne’e.
“Posibilidade orsida ami hatama ona”, katak Deputadu PLP ne’e.
Deputadu PLP ne’e afirma, governasaun ida di’akliu mak partidu ida manán maioria mesak más kazu Timor-Leste nian, insidénsia Parlamentár mak di’akliu hodi konsentra hanoin hotu hodi apoia kualkér Governu ne’ebé iha.
Jornalista: Evaristo Soares Martins
Editór: Cancio Ximenes
