DILI, 04 maiu 2020 (TATOLI) – Banku Sentrál Timor-Leste (BCTL, sigla portugés) ohin lansa relatóriu trimestrál Fundu Mina-rai Timór-Leste nian ba trimestre dahuluk ne’ebé termina iha loron 31 marsu 2020 ne’ebé hatudu katak kapitál fundu nian hamutuk biliaun US$17,03 kompara ho fin trimestre dahuluk biliaun $17,69.
“Relatóriu ne’e mós hatudu katak totál reseita ne’ebé maka simu iha trimestre ne’e hamutuk millaun $181,11, ne’ebé kompostu husi kontribuisaun husi kontribuinte sira ba fundu hamutuk millaun $70,69 no pagamentu ba royalty ne’ebé simu husi Autoridade Nasionál Petróleu (ANP) millaun $105,04 no anuál husi pipeline fee hamutuk millaun mak $5,39”, relata Vise-Governadór BCTL, Venancio Alves Maria, iha lansamentu relatóriu trimestrál trimestrál Fundu Mina-rai liuhosi vídio komferénsia, segunda ne’e.
Rendimentu husi investimentu fundu nian ne’e hamutuk millaun -$843,99, kompostu husi kupaun no jurus ne’ebé simu hamutuk millaun $102,21, maibé iha mudansa iha valór merkadu nian millaun -$938,08 no movimentu kambiais lakon mak millaun -$2,83 iha trimestre ne’e.
“Rezultadu rendimentu ba karteira fundu nian durante trimestre ne’e porsentu -4,70, enkuantu rendimentu sasukat benchmark nian ba períodu ne’e mak porsentu -4,99”, nia afirma.
Lei Fundu Mina-rai nian espesifika katak Jestór Operasionál BCTL mak hanesan ajente responsável ba jestaun operasionál Fundu Mina-rai nian.
Enkuantu, Ministériu Finansa mak responsabliza atu estabelese estratéjia investimentu tomak kona-ba fundu ne’e nian.
BCTL jere ona portefóliu besik liu ho pontu referénsia iha trimestre dala-59 dahuluk no diferensia entre portefóliu no pontu referensia hahú husi inísiu fundu nian mak pontu baze 6 ho porsentu 0,06.
Jornalista: Antónia Gusmão
Editora: Julia Chatarina
