Arsénio Bano Auto-Kuarentena Tuir Regra
DILI, 07 maiu 2020 (TATOLI) – Portavós Sentru Integradu Jestaun Krize (CIGC,),Odete da Silva Viegas, konfirma katak, Arsénio Bano ho estranjeiru ida ne’ebé submete ba auto-kuarentena kumpre regra no prosedimentu ne’ebé haktuir husi Ministériu Saúde (MS) ho Organizasaun Mundiál Saúde (OMS).
Notísia Relevante : CIGC Sei Konfirma Razaun Arsénio Bano Tama Auto-Kuarentena
Eis prezidente interinu Rejiaun Administrativu Espesiál Oe-Cusse Ambeno (RAEOA) no Zona Ekonomia Espesiál Sosiál Merkadu (ZEESM) Arsénio Bano, kuarta (06/05/2020), to’o husi nia viajen husi Australia nu’udar mós nasaun afetadu ida husi surtu Coronavirus ka COVID-19.
Arsénio Bano ho sidadaun estranjeiru ida ne’ebé atu serbisu ba ajénsia internasionál WFP (Word Food Progamme) to’o iha Timor-Leste ho aviaun Air North iha Aeroportu Internasionál Prezidente Nicolau dos Reis Lobato, hodi liu kedas ba ida-idak nia fatin hodi submete auto-kuarentena ka la’ós submete ba konfinamentu obrigatóriu (kuarentena).
“Pontu de vista saúde nia kritéria ba populasaun sira, se iha fatin adekuadu no apropriadu tuir vijilánsia Epidemolojia nian, bele halo auto-kuarentena mak ne’e tenke iha uma mesak no iha kuartu ho hariis-fatin mesak, nune’e mós labele hamutuk ho ema ne’ebé moris veneravel ho moras seluk,” esplika Odete da Silva Viegas, hodi responde jornalista kona-ba polémika Arsenio Bano la kumpre konfinamentu obrigatóriu.
Liuhusi konferénsia imprensa iha Sentru Mídia CIGC iha Sentru Konvensaun Dili (CCD), kinta (07/05/2020), Odete da Silva Viegas, hateten, Arsénio Bano ho sidadaun estranjeiru na’in-ida ne’ebé submete ba auto-kuarentena tuir regra saúde nian.
“Vijilánsia epidemolojia ba duni to’o iha sira-nia fatin haree prienxe duni kritériu no parte saúde loro-loron nafatin halo kontaktu atu kumpre no asegura durante loron-14, tanba ne’e ita boot sira labele preokupa tanba servisu vijilánsia hala’o hela sira-nia kna’ar ho profisionál,” afirma Odete Viegas.
Profisionál saúde sira, Odete Viegas hatutan, loron-loron kontinua halo kontaktu ho Arsénio Bano no sidadaun estranjeiru ne’e, karik iha sintoma ruma bele hetan kedas tratamentu.
“Sidadaun na’in-rua ne’e mós mai ho sertifikadu livre husi COVID-19 no antes ne’e sira kumpre ona kuarentena iha nasaun ne’ebé sira fila mai,” hateten Odete Viegas.
Hatán kona-ba regra implementasaun estadu emerjénsia bandu ona ema estranjeiru ho timoroan atu la bele halo viajen mai territóriu nasionál hodi halo metigasaun no prevensaun ba surtu COVID-19, Odete Viegas hateten, nia lakohi fó komentáriu ba parte ida-ne’e.
Jornalista : Nelson de Sousa
Editór : Francisco Simões
