DILI, 08 maiu 2020 (TATOLI) – Ministru Negósiu Estrajeiru no Kooperasaun, Dionísio da Costa Babo Soares, informa parte Ministériu Negósiu Estranjeiru no Kooperasaun (MNEK) simu ona rezultadu teste husi timor-oan ne’ebé maka hakotu-iis iha Irlanda.
Tuir informasaun husi diplomata timor-oan iha Reinu Unidu, timor-oan naran Luciana Viviana da Silva, hakotu-iis iha loron 03 maiu 2020, tuku 11 kalan oras Irlanda Norte, tanba sofre moras komplikasaun pneumonia.
“Kona-ba asuntu ne’e, ha’u hato’o kondolénsia ba família enlutada husi ita-nia maluk timor-oan iha ne’ebá. Ami iha ona dokumentu nesesáriu ne’ebé maihusi Ospitál Irlanda”, dehan Ministru Dionísio iha edifísiu Ministériu Finansa, Aitarak-Laran, sesta ne’e.
Tuir governante ne’e, MNEK foin simu dokumentu no sei enkamiña ba iha Sentru Integradu Jestaun Krize (CIGC, sigla portugés) atu pronunsia.
“Ami foin maka simu no ha’u sei entrega ba Sentru Integradu Jestaun Krize, hafoin ha’u hanoin sira maka sei pronunsia. Se lae ita ko’alia hanesan ne’e de’it no fó komentáriu barak tebes, ita fiar ka la fiar, tantu maluk sira ne’ebé maka hela iha ne’e no maluk balun ne’ebé maka hela iha ne’ebá (Irlanda)”, akresenta Ministru Dionísio.
Nia adianta, parte balun iha hanoin la hanesan ba kestaun ne’e no bele halo intrepretasaun oin-oin.
Matebian ho naran estimadu Anoy Soriana moris iha Dili iha loron 17 dezembru 1961 no mate ho idade 58.
Nia hanesan solteira ida no servisu iha Moypark no hela iha 70 Woodburn Crescent, Dungannon, Irlanda Norte.
Jornalista: Natalino Costa
Editora: Julia Chatarina
