DILI, 25 maiu 2020 (TATOLI) – Sidadaun estranjeiru hamutuk na’in-50 repatria ba sira-nia rai ida-idak ho Aviaun Filipina, Pan Pacific kuaze tuku 14.00 oras Timor-Leste.
Antes ne’e, Aviaun Filipina atu repatria sidadaun hamutuk na’in-72 iha loron kinta (21/05), maibé kansela tanba seidauk hetan autorizasaun espasu aérea husi parte autoridade Indonézia.
Hafoin akompaña halo repatriasaun sidadaun hirak ne’e, Embaixadór Filipina iha Timor-Leste, Abdulmaid K. Muin, informa sidadaun ne’ebé ohin halo repatriasaun tanba kauza situasaun pandemia.
“Sidadaun sira ne’e fila ba sira-nian rai tanba situsaun COVID-19 no balun deside fila tanba viza mate inklui laiha ona servisu iha Timor-Leste. Tanba ne’e, sira deside halo repatriasaun husi Timor-Leste”, dehan diplomata ne’e ba Agência Tatoli iha Aeroportu Internasionál Prezidente Nicolau Lobato, Comoro, segunda ne’e.
Notísia Relevante: Aviaun Filipina Kansela Mai Dili Tanba Seidauk Hetan Autorizasaun Aérea Husi Indonézia
Nia adianta, sidadaun ne’ebé maka ohin fila kompostu husi sidadaun Filipina na’in-35, Korea na’in-sanulu, Japaun na’in-haat inklui Amérika na’in-ida, enkuantu na’in-22 deside kansela viajen.
Kona-ba sidadaun ne’ebé maka kansela viajen, tuir Embaixadór Filipina ne’e, nia parte seidauk hatene razaun saida maka sira kansela viajen ohin loron.
“Ami ladún hatene, tanba sira balun ne’ebé maka atu halo repatriasaun la marka prezensa iha ne’e, enkuantu aviaun mós atu aranka ona”, nia akresenta.
Jornalista: Natalino Costa
Editora: Julia Chatarina
