DILI, 26 maiu 2020 (TATOLI)–Prezidente Repúblika, Francisco Guterres L”ú Olo”, ohin, hafoin rona hanoin ne’ebé favoravel ba pedidu Governu hosi Konsellu Superior Defeza no Seguransa (KSDS) no Konsellu Estadu haruka mensajen ba Parlamentu Nasionál husu autorizasaun ba estensaun Etadu Eerjénsia.
Mensajen datoluk hosi Xefe Estadu ne’e, husu autorizasaun Parlamentu Nasionál ba estensaun estadu emerjénsia ba periodu foun durante loron-30, sei hahú hosi kinta feira oras 00, 28 maiu to’o sesta feira, oras 00, 27 juñu 2020.
Implementasaun estadu emerjénsia ba loron-30 ba oin sei suspende parsialmente direitu no garantia balun hanesan sirkulasaun internasionál, liberdade ba sirkulasaun no fixasaun rezidénsia iha pontu ne’ebé de’it iha territóriu nasionál no direitu ba rezisténsia.
Timor-Leste rasik deklara tiha ona laiha kazu konfirmadu ho COVID-19 tanba ema na’in-24 hotu-hotu rekuperadu no la hamate ema ida maibé ne’e la signifika Timor-Leste livre ona hosi COVID-19.
“Ha’u-nia konviksaun katak impozisaun ba manuntesaun medida konjuntu importante atu prevene virus SARS-CoV-2 tama ba ita-nia territóriu no ninia transmisaun entre populasaun ne’ebé moris hamutuk, hanesan bandu ema tama territóriu nasionál, impoin izolamentu obrigatóriu ba kazu determinadu sira no sujeisaun obrigatóriu ba rezidente iha Timor-Leste tuir medidas kontrolu sanitáriu,” dehan Prezidente Repúblika, Francisco Guterres L”ú Olo”, liuhosi Komunikadu Imprensa ne’ebé Ajensia TATOLI asesu liuhosi midia Prezidénsia Repúblika, tersa ne’e.
Prezidente Repúblika fó hanoin hikas ba Deputada no Deputadu sira katak nesesidade ba estensaun Estadu Emerjénsia iha ligasaun forte ho evolusaun preokupante ba situasaun epidemilojójika no proliferasaun kazu rejistradu transmisaun komunitária COVID-19 iha Repúblika Indonézia, partikularmente iha Timor Osidentál.
Situasaun ide ne’e, ezije nafatin manuntensaun ba aplikasaun sasukat estraordináriu balu, ne’ebé ladun makaas, atu trava pandemia, evita transmisaun kazu foun ba infesaun coronavirus (CIVID-19) foun iha territóriu nasionál.
Governu hatama pedidu estensaun estadu emerjénsia horisehik (segunda, 25 maiu 2020) bazeia ba realidade katak kazu pozitivu COVID-19 globalmente aumenta. Maske kazu barak rekuperadu iha nivel mundiál maibé COVID-19 sei kontinua alastra hosi ema ba ema iha fatin ida ba fatin seluk.
Organizasaun Saúde Mundiál rasik fó-sai katak seidauk hatene bainhira mak rohan hosi pandemia ne’e.
Timor-Leste deklara kazu pozitivu ida ho COVID-19 iha loron 21 marsu 2020, ho Estadu nia naran iha 27 marsu 2020, Prezidente Repúblika deklara estadu emerjénsia ba fulan ida. Prezidente Repúblika estende estadu emerjénsia ba loron-30 tan, hosi 28 abril to’o 27 maiu 2020.
Estadu implementa estadu emerjénsia ho objetivu atu hasees sidadaun hotu-hotu iha Timor-Leste hosi kalamidade públika ne’ebé bele mosu husi COVID-19.
Parlamentu Nasionál sei diskute mensajen Prezidente Repúblika hodi aprova ka lae mensajen hosi Prezidente Repúblika ne’e. Prezidente Repúblika sei deklara estadu emerjénsia ba periodu foun bainhira hetan autorizasaun hosi Parlamentu Nasionál.
Notísia Relevante: Ohin, PR Lú Olo Prezide Reuniaun KSDS-KS Kona-ba Estensaun EE
Jornalista : Cipriano Colo
Editór : Cancio Ximenes
