DILI, 27 maiu 2020 (TATOLI)-Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, hateten nia parte maka sei halo armazenamentu ba ekipamentu protesaun surtu COVID-19 ne’ebé mak oferese ona husi Empreza Xineza, Jack Ma no Fundasaun Alibaba ba Governu Timor-Leste.
“Ami halo hela prosesu resepsaun husi ekipa alfandega ninian no depois sei lori ekipamentu sira ne’e ba armazén SAMES,”dehan Nia ba jornalista sira, hafoin simu doasaun ekipamentu husi doadór sira husi Xina, iha Aeroportu Comoro, Ohin.
Notísia Relevante :Governu Timor-Leste Agradese Doasaun Husi Jack Ma no Ali Baba Foundation
SAMES mak iha papel hodi halo armazenamentu ba ekipamentu sira ne’ebé apoiu husi kualker doador sira.
Tuir nia molok halo distribuisaun materiál hirak ne’e ba munisípiu, nia parte halo hela koordenasaun ho Ministériu Saúde hodi haree mekanismu distribuisaun ida di’ak atu nune’e bele uja ho responsabilidade.
Notísia Relevante :Xina Kompromete Sei Ajuda Tan Ekipamentu COVID-19 Iha Fulan-Juñu
“Ami agora daudaun koordena ona ho Ministériu Saúde oinsá mak atu bele halo distribuisaun ne’ebé mak hanesan ba Munisípiu sira nune’e mós ba ospitál sira atu nune’e ita utiliza sasan sira ne’e ho didiak, tanba ita labele halo distribuisaun ne’ebé mak laiha prosesu ruma entaun ne’e sei mosu mal gastu,”nia hatutan.
Materiál ne’ebé maka doadór na’in rua ne’e oferese ba Governu liuhosi Ministériu Saúde, tersa ohin, maka hanesan máskara hamutuk 130.00, luvas medisina 20.000, ekipamentu protesaun pesoál 5.000, protesaun ba oin hamutuk 5.088, reajente purifikasaun 5.040, reajente konservasaun amostra 5.000, termómetru 39 no ventiladór hamutuk 10.
Jornalista : Felicidade Ximenes
Editór : Agapito dos Santos
