DILI, 29 maiu 2020 (TATOLI) – Prezidente Autoridade Rejionál Administiva Oé-cusse Ambeno, José Luís Guterres iha loron 29 maiu hala’o enkontru ho entidade relevante hotu iha Oé-cusse hodi fahe informasaun kona-ba planu dezenvolvimentu hirak ne’ebé atu hala’o iha RAEOA.
Sorumutu ne’e mós sai oportunidade hodi rona aspirasaun husi komponente hotu iha Oé-cusse inklui dezafíu hirak ne’ebé sira infrenta durante ne’e.
“Ha’u laran ksolok atu konvida no hasoru malu ho autoridade lokál ho parte entidade hotu iha RAEOA hodi foti desizaun hamutuk ba futuru dezenvolvimentu RAEOA”, dehan Prezidente Autoridade RAEOA hanesan haktuir iha nota imprensa ne’ebé Agência Tatoli asesu, sábadu ne’e.
Iha sesaun abertura husi sorumutu ne’ebé hala’o iha Otél Fitun Lima, Oé-Pupu, Oé-Cusse, ne’e hetan partisipasaun másimu husi autoridade lokál, reprezentante igreja, sosiedade sivíl, veteranu sira, reprezentante partidu polítiku sira inklui forsa seguransa Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).
Sorumutu ne’e oportunu tebes tanba fó oportunidade ba reprezentante sira hodi hato’o sira nia opiniaun kona-ba saida mak sira hakarak ba futuru inklui rona problema hirak ne’ebé sira enfrenta iha tempu anteriór.
Kona-ba problema hirak ne’ebé komunidade enfrenta, liuliu kona-ba kestaun rai, Lugu dehan sei kolabora hamutuk ho entidade hotu atu buka solusaun ba problema ne’e.
“Ha’u bolu Señor Silvério Pinto Baptista atu mai ajuda ita hodi koordena ho autoridade lokál sira, nune’e bele haree parte legál kona-ba kestaun rai no problema seluk. Ha’u fiar katak hamutuk ita sei rezolve kestaun rai ne’e”, dehan Prezidente Autoridade RAEOA.
Iha sorumutu ne’e, José Luís kontinua énfaze hodi foka ba konstrusaun estrada ligasaun entre sub-rejiaun tolu Pásabe, Oé-silo no Nítibe hodi bele fasilita movimentu komunidade asesu ba merkadu.
Nune’e mós iha setór marítima, Autoridade RAEOA sei prevee orsamentu husi Orsamentu Jerál Estadu 2020 no 2021 hodi halo akizisaun ba ró patrullamentu ba polísia marítima hodi kontrola tasi.
“Polítika orsamentál tenke envolve másimu Atoni-oan atu sira sente na’in ba dezenvolvimentu iha RAEOA”, Prezidente Autoridade subliña.
Parte seluk, nia kontinua asegura katak autoridade sei kontinua konvida autoridade lokál, relijiozu no relijioza, sosiedade sivíl hodi dezeña hamutuk planu orsamentu jerál ho nia ezekusaun ba RAEOA.
Kona-ba kompozisaun kargu sekretáriu rejionál ne’ebé mak to’o ohin loron seidauk prienxe, perante enkontru ne’e, Lugu realsa sei aprezenta lista ba Primeiru-Ministru, Taur Matan Ruak iha semana oin.
“Tempo to’o ona ita atu aprezenta sekretáriu rejionál sira no ha’u promete dezde ha’u-nia mandatu inísiu katak asume kargu ne’e, maioria mai husi Oé-cusse-oan. Ha’u sei haruka karta no naran sira ba Primeiru-Ministru para bele deside loron ba pose nian”, deklara José Luís Guterres.
Iha sorin seluk, Xefe Aldeia Sanane, Suku Costa, Francisco, hateten nia parte hakarak sujere Prezidente Autoridade foun atu rezolve kestaun rai.
“Bainhira orsamentu iha karik bele fó kompensasaun ba rai no plantasaun. Ha’u sempre apoiu atu rezolve problema pasadu tanba ne’e ita tenke haree ba dezenvolvimentu RAEOA iha futuru”, dehan Francisco.
Iha biban ne’e mós, líder komunitáriu ne’e agradese no apresia inisiativa Prezidente Autoridade RAEOA ne’ebé hakarak halibur autoridade lokál sira hodi kontribui hanoin hodi dezenvolve Oé-cusse.
Iha reuniaun ikus ne’e, Lugu konvida konvidadu sira hodi hala’o vizita ba Aeroportu Oé-cusse, Rota do Sândalo.
Jornalista: Florêncio Miranda Ximenes
Editora: Julia Chatarina
