DILI, 12 juñu 2020 (TATOLI) – Primeiru-Ministru Taur Matan Ruak, fó ona pose ba Prezidente Autoridade (PA) Rejiaun Adminsitrativu Oé-cusse Ambeno (RAEOA) no Zona Espesiál Ekonomia Merkadu Sosiál, Timor-Leste (ZEEMS,TL) foun, Arsénio Paixão Bano hodi subtitui José Luís Guterres ‘Lugu’.
Iha seremónia toma pose PA RAEOA ne’e, PM Taur dehan nomeasaun ne’e hanesan prerogativu Konsellu Ministru no fó pose husi Xefe Ezekutivu, ne’ebé ba datoluk ona hahú husi Marí Alkatiri, José Luís Guterres ‘Lugu’ no atuál PA, Arsénio Paixão Bano.
“Ha’u husu atu Oé-cusse-oan sira hamutuk sai ida de’it, la’ós de’it iha ibun maibé tenke iha hahalok atu hotu-hotu tau matan ba sidadaun sira ne’ebé hanesan ita bo’ot sira nia inan-aman no família rasik, ne’ebé laiha númeru ida, númeru rua satán númeru tolu, hotu-hotu atoni-oan no ema ida de’it, tanba hanesan timor-oan atu dezenvolve Oé-cusse no Ambeno,” tenik PM Taur iha Palásiu Governu, sesta ne’e.
Notísia Relevante: Governu Ezonera Lugu no Nomeia Arsénio Bano Asume PA RAEOA
Xefe Governu husu ba Arsénio Bano no Oé-cusse oan sira atu aproveita oportunidade ida ne’e hodi dezenvolve Oé-cusse tanba sei hasoru situasaun defísil kompara ho fatin sira seluk.
“Tanba populasaun barak sei ki’ak, analfabetizmu, má-nutrisaun a’as no boot, maibé kontinua umilde iha fuan. Ha’u hakarak fó parabéns ba grupu joven dahuluk ne’ebé toma konta ba Autoridade RAEOA, hafoin Doutor Marí no Doutor Lugu ne’ebé hanesan jerasaun hluk ne’ebé luta ba Timor-Leste nia ukun-an, fó kontribuisaun ba dezenvolvimentu Timor-Leste nian,” nia akresenta.
“Ha’u husu mós ba Prezidente Autoridade tenke hatudu iha dever no obrigasaun no hatudu komportamentu detalla, ho forma iha ligasaun ho Governu Sentrál hodi garante seguransa sidadaun sira no bem-estar ba ita-nia sidadaun iha prosesu dezenvolvimentu, atu labele sente hanesan segunda pesoa iha nia-rai rasik,” Xefe Governu rekomenda.
Xefe Ezekutivu fó hanoin, kna’ar ne’ebé Governu Sentrál fó fiar ba PA foun ne’e importante, tanba ne’e husu atu asume responsabilidade ho di’ak.
“Governu Sentrál fó apoia de’it ne’ebé dezeju boa sorte. Ha’u pesoalmente husu ba atoni-oan sira hotu hamutuk tanba laiha partidu CNRT, PLP, FRETILIN no KHUNTO, maibé iha ema ida de’it mak atoni-oan,” tenik PM Taur.
Tuir eis Prezidente Repúblika, Oé-cusse la’ós espesiál, maibé populasaun mak espesiál tanba ne’e mak Governante hotu halo esforsu atu jere rekursu umanu no finaseiru ba munsípiu hotu.
“Buat barak halo ona no buat barak seidauk halo, ida seidauk halo ne’e barak liu iha monentu situasaun iha ita nia país komesa difikuldade hanesan reseita petrolíferu tun maibé nesesidade aumenta. Ita-nia sidadaun aumenta, ita-nia rekursu mós tun,” katak Xefe Ezekutivu ne’e.
PM Taur espera ho rekursu oituan ne’ebé iha husi Governu Sentrál partilla bele sufisiente ba hotu-hotu, inklui ba RAEOA maski oituan maibé espera katak Autoridade bele uza ho di’ak no konsentra ba nesesidade ne’ebé afeta pozitivu ba sidadaun sira.
“Prezidente Autoridade konta ho ha’u nia apoiu, ha’u-nia Governu tomak nia apoiu ba saida mak ami bele halo atu ajuda ita bo’ot no ekipa, ami sei halo. Ha’u husu atu labele haluha ha’u-nia rekomendasaun sira tanba ha’u kontinua akompaña nafatin ita bo’ot sira nia esforsu no dedikasaun,” PM subliña.
Iha sorin seluk, Prezidente Autoridade RAEOA-ZEEMS, TL emposadu, Arsénio Paixão Bano promote sei kontinua obra sira husi eis PA Marí Alkatiri no Lugu.
“Ha’u Promete ho fiar, atu gasta ha’u nia tempu tomak ba ha’u-nia rai hamutuk ho ha’u nia inan-aman no família sira iha Oé-cusse hodi hala’o dezenvolvimentu atu fó onra no kumpre promesa ba sira ne’ebé mate rihun ba rihun,” nia promote.
Nia afirma iha mandatu ne’e sei kontinua servisu hamutuk ho eis PA Marí Alkatiri tanba ho obra no planu barak husi nia atu dezenvolve ekonomia iha Oé-cusse sei maka’as liután.
“Ami presiza nafatin Governu Sent nia apoia no ami hakarak Governu atuál sai forte hodi serví povu Timor-Leste,” nia akresenta.
Jornalista: Florêncio Miranda Ximenes
Editora: Julia Chatarina
