DILI, 14 juñu 2020 (TATOLI)–Administradór Postu Administrativu Ataúro, Munisípiu Dili, Mateus Belo, informa ekipa pagamentu sei konklui relatóriu sira no iha tersa (6/06/20200) semana oin, sei submete ba Governu.
Notísia Relevante: Ataúro Finaliza Ona Pagamentu Subsidiu $200 ba Uma-Kain
“Ita-nia ekipa pagamentu sei konklui relatóriu sira ne’e, parese semana oin, tersa-feira hanesan ne’e, ita bele submete ona lista benefisiáriu ba Governu,” dehan Administradór Postu Administrativu Ataúro, Mateus Belo, ba Agência TATOLI via telefónika, domingu ne’e.
Nia hatutan, prosesu pagamentu ne’e iha esforsu maka’as no organiza ho di’ak hosi ekipa pagamentu hodi prosesu ne’e aselera to’o finaliza iha sábadu (13/06/2020) horisehik.
“Bazeia ba oráriu ne’ebé iha katak kada loron ida atende aldeia ida maibé realidade ne’ebé akontese iha ami-nia Postu Administrativu Ataúro, iha loron haat nia-laran de’it (hosi 09-12/06/2020) pagamentu bele finaliza ho susesu,” nia informa.
Aleinde ne’e, nia haktuir, totál benefisiáriu ne’ebé mak simu ona pagamentu subsídiu $200 iha Postu Administrativu Ataúro hamutuk 2.536.
Nia hateten, lista naran ne’ebé mak hetan aprovadu no tama iha lista benefisiáriu hamutuk 2.682, no entrega lista naran pagamentu sira ne’e ba parte relevante atu bele verifika no fasilita hodi halo sira-nia fixa família hodi tau atensaun mós ba hirak ne’ebé mak lista naran laiha.
“Benefisiáriu ba pagamentu subsídiu $200 ne’ebé mak simu ona hamutuk ho montante orsamentu hamutuk $507.200 no reklamasaun iha ema na’in-146,” Administradór Postu Administrativu Ataúro Munisípiu Dili, Mateus Belo, hateten.
Postu Administrativu Ataúro komopstu iha Suku lima (5) mak hanesan Suku Beloi, Biqueli, Macadade, Maquili no Suku Vila-Maumeta ho Aldeia hamutuk 19.
Notísia Relevante: Pagamentu Loron Dahaat, Munisípiu Dili Atinje Ona 16.36%
Jornalista : Osória Marques
Editór : Cancio Ximenes
