DILI, 18 juñu 2020 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longuinos Armando Leite, hatetee Governu sei selu lista reklamasaun ba faze daruak nian no ohin hatama ona proposta ba iha Parlamentu Nasionál.
“Ita-nia Governu mós alerta no hatama ona iha Parlamentu Nasionál katak sei fó subsídiu $200 ba reklamasaun hirak ne’ebé ita deteta iha prosesu pagamentu nia laran. Reklamasaun hirak ne’e, Governu sei haree,” dehan Prezidente Konsellu Administrasaun Institutu Nasionál Seguransa Sosiál (INSS), Longuinos Armando Leite, ba Agência TATOLI liuhosi entrevista iha nia knaar fatin, Caicoli, Dili, kinta ne’e.
Prezidente INSS hatutan, INSS prontu simu lista reklamasaun hodi halo verifikasaun ba dadus nune’e ida ne’ebé prenxe kritériu mak sei simu subsídiu tuir mai.
“Ami kontinua hein dadus reklamasaun hosi Munisípiu 12 nian mak foin deside, ida ne’ebé mak bele simu no ida ne’ebé mak la simu,” nia dehan.
Oinsá kona-ba traballadór ne’ebé ho rendimentu $501 maibé naran kontinua sai iha lista benefisiáriu, Prezidente INSS hatán, Seguransa Sosiál parese la hatama dadus ba INSS tanba bainhira hatama INSS sempre verifika tuir baze de dadus INSS nian.
Nia haktuir, INSS halo verifikasaun ne’e mak deteta ema hetan rendimentu $501 ba leten hamutuk 2000-resin mak esklui ona ne’e.
“Ha’u hatene públiku kestiona makaas kona-ba kestaun ne’e maibé dadus lato’o iha ami. Tanba ne’e mak naran lista ho rendimentu boot kontinua sai tanba dadus la to’o iha ami,” nia klarifka.
Tuir nia katak reklamasaun ne’ebé ekipa pagamentu deteta iha loron dasia ba prosesu pagamentu hamutuk uma-kain 8.279.
Jornalista :Osória Marques
Editór : Cancio Ximenes
