DILI, 22 juñu 2020 (TATOLI) – Governu husu autorizasaun ba Parlamentu Nasionál atu hala’o levantamentu estraordinária Fundu Petrolíferu daruak ho montante millaun $286,8 hodi garante funsionamentu mákina Estadu no rekuperasaun ekonómika ne’ebé hetan impaktu husi COVID-19.
Ministru Finansa, Fernado Hanjam, hateten Governu aprezenta proposta ne’e tanba haree mós ba Orsamentu Jerál Estadu (OJE) 2020 seidauk tama ein-vigór.
“Governu bele rekorre ba reseita fiskál no saldo tinan anteriór nian hodi finansia despeza públiku sira, nune’e mákina Estadu bele la’o ho di’ak,” tenik Ministru Fernado Hanjam iha ámbitu diskusaun no votasaun jeneralidade ba proposta lei númeru 17/V (2), iha sala plenáriu PN, segunda ne’e.
Maski iha loron 6 abríl PN autoriza ona tranferénsia Fundu Petroliféru dahuluk liuhosi lei númeru 2/2020 ho montante $250 maibé reseita sira ne’e premite de’it finasiamentu regulár administrasaun públiku to’o fulan-agostu.
“Ita haree orsamentu la sufisiente to’o Orsamentu Jerál Estadu 2020 tama ein-vigór, tanba ne’e Governu hakat mai fali iha Parlamentu hodi husu tan autorizasaun halo transferénsia ho montante millaun $286.8,” nia akresenta.
Husi orsamentu millaun $286,8, atu reforsa kofre Estadu finánsia servisu administrasaun públika ho montante millaun $168,8 no antesipa despeza hasoru COVID-19 inklui rekuperasaun atividade ekonómika ho alokasaun millaun $100 ba Fundu COVID-19 to’o OJE 2020 vigora.
Tuir governante, levantamentu ne’e atu garante kontinuadade funsionamentu instituisaun Estadu nian, asegura pagamentu obrigasaun legál no kontratuál sira ne’ebé Estadu asina ona no garante mós saldo tezouru atu labele menus husi millaun $200.
Governu propoin tranferénsia dahuluk ho montante millaun $250 no tranferénsia tuirmai ho montante $286,8, ne’ebé ho totál transferénsia husi Fundu Petrolíferu iha tinan ne’e hamutuk millaun $536.8 husi redimentu sustentavél estimadu.
“Montante tranférensia refere sei tranfere ba konta jerál Estadu tezouru nian no mós iha fleksibilidade ba Governu hodi utiliza iha ámbitu Dotasaun Orsamentu Temporária (DOT) nó mos Fundu COVID-19,” nia subliña.
Alterasaun Fundu COVID-19 Fó Fleksibilidade ba Governu
Iha forma hanesan, Governu mós aprezenta proposta ba PN atu halo alterasaun dahuluk lei númeru 2/2020, ne’ebé kria Fundu COVID-19 hodi inklui iha artigu 5 kona-ba finalidade fundu nian, liuliu ba médida ekonómiku no protesaun sivíl hodi resposta ba prevensaun no kombate surtu COVID-19, nune’e bele iha fleksibilidade halo implementasaun programa.
Iha alterasaun lei ne’e, integra mós finalidade harii Fundu COVID-19 nian hodi iha medida espesífiku ba apoia sosi-ekonómiku.
“Liuliu ba ita-nia komunidade área rurál sira ne’ebé afetadu no menus atividade ekonomia tanba medida kontesaun ba prevensaun COVID-19 nian. Iha despeza fundu nian, Sentru Intergradu Jestau Krize (CIGC,sigla portugés) simu funsaun hanesan koordenasaun ba estratejia nasionál ba prevensaun no kombate COVID-19 iha Timor-Leste,” nia akresenta.
Jornalista: Florêncio Miranda Ximenes
Editora: Julia Chatarina
