DILI, 24 juñu 2020 (TATOLI)-Ministra Edukasaun Juventude no Desportu Demisionária, Dulce de Jesus, ho Vise Ministru, João Zacarias Freitas Soares, tuir planu iha kinta (25/06), sei entrega ofisialmente servisu instituisaun nian ba Ministru foun, Armindo Maia ho Vise Ministru, António Guterres.
Serimonia entrega responsabilidade ne’e sei hala’o iha edifísiu Ministériu Edukasaun Juventude no Desportu (SEJD), Vila-Verde Dili.
“Antes ne’e ha’u hatama tiha ona karta rezignasaun ba Primeiru-Ministru, tuir orintasaun husi ha’u nia partidu rasik, maibé Xefe Governu husu ha’u nafatin mantein lai hodi hein Ministru foun simu pose,” informa Dulce de Jesus Soares, ba TATOLI, iha Vila-Verde, kuarta ne’e.
Dulce esplika nia hatama karta rejignasaun ba Primeiru-Ministru, Taur Matan Ruak iha loron 25 fulan maiu, tuku 09:00 Otl; maibé iha loron 27 fulan hanesan Xefe Governu husu ba nia atu kontinua asume kna’ar ne’e to’o membru Governu foun simu pose.
Tanba ne’e antes atu husik kargu refere, Ministra Edukasaun sesante hodi naran pesoál hato’o deskulpa ba kargu Xefia MEJD, Dirijente iha eskola idaidak husi Nasionál to’o baze no mós seluk tan bainhira halo erru ruma durante ninia mandatu tinan rua.
Entretantu, tuir observasaun TATOLI nian nota, oras ne’e Funsionáriu Públiku husi MEJD nian halo ona preparasaun másimu tanba harii tenda, forma ona kadeira atu simu Ministru foun iha kinta aban.
Jornalista : Tomé Amado
Editór : Agapito dos Santos
