DILI, 25 juñu 2020 (TATOLI)-Sekretáriu Estadu Juventude no Desportu (SEJD), Abrão Saldanha, hateten durante ninia mandatu sei fó prioridade atu integra hikas Grupu Arte Marsiál ba Sosidade nia leet no mós enkuadra atividade ne’e iha sistéma nasionál desportu.
“Haree ohin loron arte marsiál hanesan sodiedade klase daruak no estadu halo ona pakote legalizasaun no eskema oioin nune’e bele re-integra sira iha sosiedade nune’e bele kria atividade rasik ne’ebé kontrola másimu husi Governu,”dehan Governante ba Jornalista sira hafoin tama ona servisu iha SEJD Lecidere Dili, kinta ohin.
Notísia Relevante:SEJD Foun Sei Dezenvolve Talentu Joven Sira
Governu konstitusionál daualu foinlalais ne’e foti ona desizaun hodi re-ativa atividade Grupu Arte Marsiál tolu hanesan Persaudaraan Setia Hati Terate (PSHT) IKS no Kmanek Oan Rai Klaran (KORK).
Hodi hatutan atu fó susesu ba programa Governu nian hodi dezenvolve área desportu maka presiza kria koordenasaun servisu hahú kedas husi nivél funsionáriu to’o kargu Xefia sira hotu.
“Knaar ne’ebé ha’u simu iha rasik nia dezafiu maibé ho ekipa hotu ne’ebé iha agora husi Diretór no Funsionáriu sira hotu hanoin ami bele ultrapasa hamutuk dezafiu sira ne’e,” katak Abrão.
Jornalista : Hortencio Sanchez
Editór : Agapito dos Santos
