DILI, 29 juñu 2020 (TATOLI) – Hosi tinan 2015 to’o 2019, Provedoria Direitu Umanu no Justisa (PDHJ) fasilita ona formasaun kona-ba direitu umanu ba membru Polísia Nasionál Timor-Leste (PNTL) hamutuk 386 iha territóriu.
Notísia Relevante : PDHJ Kontinua Fó Formasaun Governasaun Di’ak ba Ajente Estadu
Provedora Jesuína Maria Ferreira, ohin, liuhosi aprezentasaun relatóriu ba Parlamentu Nasional esklarese katak, matéria formasaun ne’e rasik foku ba iha direitu umanu báziku, polisiamentu no uza forsa polísiamentu iha kapturasaun no detensaun, polísiamentu direitu umanu ba ema veneravel.
Nia tenik, iha tinan 2019 fó ona formasaun ba kadete membru PNTL na’in-46 kompostu hosi feto na’in-rua no mane 44. Tanba ne’e, hosi 2015 to’o 2019 halo ona formasaun kona-ba direitu umanu ba membru Polísia Nasionál Timor-Leste (PNTL) hamutuk 386; feto na’in-55 no mane na’in- 331.
Iha 2019, PDHJ mós realiza semináriu kona-ba knar polísia oinsá halo protesaun ba direitu umanu hodi habelar nafatin informasaun ba prevensaun ba komandante munisipál, unidade no seksaun PNTL nian hamutuk 44; feto n’in-2 no mane na’in-42.
Jesuína Ferreira, hateten, ho formasaun ne’e bele hasa’e liu tan koñesimentu membru PNTL sira nian liu-liu ba atuasaun sira iha terrenu hodi la’o tuir regra no prosedimentu ne’ebé iha hodi labele viola direitu umanu hasoru sidadaun.
Antes halo treinamentu ekipa fasilitadór halo uluk teste hodi hatene koñesimentu hosi membru sira-ne’e hatudu 57% depois treinamentu halo fali cost test rezultadu sira-nia koñesimentu sa’e ba 93%,” Nia hateten.
PDJH servisu hamutuk ho PNTL no Unidade Asesória Direitu Umanu hosi Organizasaun Nasaun Unida (ONU) iha Timor-Leste, rede Defensor Direitu Umanu, NGO AJAR, HAK, Fundasaun Mahein hodi realiza atividade formasaun refere bazeia ba pedidu.
Jornalista : Nelson de Sousa
Editór : Francisco Simões
