DILI, 30 juñu 2020 (TATOLI) – Prezidente Conselho de Imprensa (CI), Virgílio Guterres, hateten durante mandatu tinan-haat nia-laran iha planu importante rua maka CI la konsege atinje.
“Buat ne’ebé maka durante tinan-haat ami la konsege halo maka labele regula prosesu fó karteira profisionál hanesan ezame estájiu ba jornalista sira. Ami planu tinan-ida dala-rua atu fó ezame ba ema sira ne’ebé halo estájiu, nune’e bele hetan karteira profisionál maibé ho situasaun duodésimu ami labele halo,” dehan Prezidente CI hafoin ramata enkontru ho Ministru Asuntu Parlamentár no Komunikasaun Sosiál, Francisco Jerónimo, iha Palásiu Governu, tersa ne’e.
Planu seluk ne’ebé la konsege halo maka kona-ba halo multa ba mídia sira ne’ebé viola kódigu étika jornalista.
“Durante ne’e ami-nia aprosimasaun barak liu pedalójika no sosializa kuadru legál sira ne’ebé iha. Parte ne’ebé atu fó sansaun maka ba sira ne’ebé viola kódigu étika ba hanesan lakohi públika direitu resposta husi públiku. Ami informa ba Ministru Asuntu Parlamentár no Komunikasaun Sosiál atubele servisu hamutuk ho Ministériu Finansa atu hamosu dekretu ruma atu hola medida saida maka bele regulariza, nune’e bele simu reseita maihusi,” nia akresenta.
Nune’e, Prezidente CI iha esperansa katak Governu bele apoiu inisiativa ne’e.
“Ba kestaun ne’e presiza iha kooperasaun entre ministériu tutela ho Ministériu finansa, atu kria konta bankária ruma no osan koema sira ne’ebé infratór sira komete bele selu no tama direita ba kofre Estadu. Ida-ne’e husi parte Governu maka tenke halo,” Virgílio Guterres subliña.
Tuir nia, planu sira labele realiza tanba kauza husi situasaun rejime duodésimu husi 2017 mai to’o agora.
“Tanba ne’e CI labele halo no biban ne’e informa ba Ministru atu ba oin hametin nafatin koopersaun ho membru CI foun, atu nune’e bele konkretiza planu sira ne’e,” tenik Prezidente CI.
Iha fatin hanesan, Ministru Francisco Jerónimo hateten nia parte sei konsidera hodi fó apoiu nafatin ba planu sira iha futuru mai.
“Karik iha futuru ami sei haree hamutuk no halo aplikasaun ba planu sira ne’e,” dehan governante ne’e.
Nia haktuir, durante sorumutuk ho membru CI, halo diskusaun oituan kona-ba programa foun no atividade jornalista mídia Estadu hanesan RTTL,ep no Agência Tatoli, ne’ebé iha relasaun ho komunikasaun sosiál.
Jornalista: Natalino Costa
Editora: Julia Chatarina
