DILI, 30 juñu 2020 (TATOLI)-Timor-Leste Coalition for Education (TLCE) sujere ba Ministru Edukasaun Juventude no Desportu, Armindo Maia atu estuda filafali projetu Basic Strengthening and Tranformation (BEST) ne’ebé maka Governu anteriór asina ona akordu ho Banku Mundiál hodi impresta osan millaun $ 23.5 tanba sei hamosu tendensia ba setór edukasaun iha futuru.
Koordenadór TLCE, José Monteiro, hateten orsamentu ne’e apoiu husi Estadu Doadór sira ne’ebé hamahan an iha Global Partnership Education.
“Ami hatene ona katak planu projetu BEST ne’e ninia orsamentu sei hatama hamutuk iha Orsamentu Jerál Estadu nian nivel global duke asuntu kiikoan iha edukasaun nia laran,”dehan nia durante konferénsia imprensa iha FONGTIL, Caicoli, tersa ne’e.
Tuir analiza husi TLCE nian katak bainhira Parlamentu Nasionál aprova projetu ne’e hamutuk ho orsamentu Jerál Estadu sei fó benefisiu ba grupu balun no sei la dezenvolve di’ak setór Edukasaun.
“Ami halo ona analiza se karik projetu ne’e mak realiza duni povu ki’ik sei la hetan benefisiu maibé sei habokur de’it grupu balun,”tenik tan.
Fundu ne’e apoiu husi Estadu riku sira hamutuk hodi tulun nasaun ki’ak sira iha mundu atu aselera objetivu dezenvolvimentu Sustetavél (ODS) IV, maibé Timor-Lese sei selu filafali tusan ne’e iha tinan 10 oin mai.
“Agora kuandu ita impresta miliaun $ 15, tinan 10 oin mai mak ita foin hahú selu. entaun ha’u kalkula miliaun 15 x 3 ita tenki selu fali miliaun 45 ba GPE iha 2030,”nia esplika tan.
Jornalista : Tomé Amado
Editór : Agapito dos Santos
