iklan

NASIONÁL, EKONOMIA, HEADLINE

MTKI no Dioseze Dili Deside Loke Hikas Sítiu Nain-Feto Ramelau

MTKI no Dioseze Dili Deside Loke Hikas Sítiu Nain-Feto Ramelau

Padre Angelo Salsinha no Diretór Jerál Turizmu, José Filipe Dias Quintas hala’o konferensia impresa hodi loke ofisialmente sítiu Nain-Feto Ramelau. Imajen Tatoli/ Florencio Miranda Ximenes

DILI, 01 jullu 2020 (TATOLI) – Ministériu Turizmu, Komérsiu no Industria (MTKI) no Dioseze Dili deside loke hikas sítiu Nain-Feto Ramelau ba vizitante sira, maibé kontinua tuir regra ne’ebé estabelese ona husi Ministériu Saúde hodi prevene-an husi COVID-19.

MTKI ho Dioseze Dili deside taka provizóriu sítiu relijiozu ne’e hahú husi 23 marsu to’o juñu tanba iha situasaun Estadu Emerjénsia.

“Bemvindo mai fatin sagradu sítiu Nain-Feto Ramelau tanba hahú loke ofisialmente ona, maibé importante liu tenke buka respeitu fatin ne’e atu sai fatin furak ba bensaun no grasa mai ita no ba ema seluk hodi hetan matak-malarin,” tenik Padre Angelo Salsinha, nu’udar Reprezentante Dioseze Dili ba asuntu Turizmu Ramelau, liuhosi konferénsia impresa, iha Sentru Infrormasaun Turistíku, Lecidere, kuarta ne’e.

Padre Angelo mós husu ba vizitante sira, bainhira atu ba sítiu ne’e tenke respeitu no asegura ambiente liuliu ba sarani sira tenke tuir rituál igreja katólika nian iha Nain-Feto Ramelau.

Regra husi uma-kreda, Padre Angelo husu atu rituál ne’ebé la tuir igreja katólika nia labele ba halo iha ne’ebá hodi halo konfuzasaun ba sarani katólika sira iha Timor-Leste.

“Atu ba reza ka orasaun tuir rituál igreja katólika nian bele ba iha ne’ebá, maibé tradisaun ida ne’ebé la tuir uma-kreda nian ba buka fatin seluk tanba la’ós nia fatin mak iha Nain-Feto Ramelau tanba ita nia sítiu ne’e atu ba husu matak malirin no besaun husi Nain-Feto,” nia apela.

Padre Dioseze Dili mós husu sarani sira ne’ebé ba vizita tenke kontinua tuir regra Ministériu Saúde liuliu uza máskara no asegura distánsia sosiál hodi halo devosaun ho di’ak.

Fatin hanesan, Diretór Jerál Turizmu, José Filipe Dias Quintas, hateten MTKI koopera ho Dioseze Dili deside loke ofisalmente sítiu Nain-Feto Ramelau tanba Estadu Emerjénsia ramata ona.

“Ami hato’o ba públiku katak sítiu Nain-Feto Ramelau loke ofisialmente ona ne’ebé vizitante ka sarani sira ne’ebé hakarak ba husu tulun no grasa ba Nain-Feto Ramelau atu tulun ita husi pandemia globál ne’e, bele hotu no fó tulun na’i-ulun sira atu dezenvolvimentu rai ne’e ba la’o ba oin,” nia akresenta.

Diretór Jerál Turizmu ne’e kontinua ekoraja nafatin ba vizitante sira, liuliu Joven sira atu mantein disiplina tuir protokolu Ministériu Saúde hanesan distasiamentu sosiál, uza máskara no fase liman hodi prevene-an husi surtu ne’e.

“Ami husu mós ba vizitante sira atu iha konsiénsia tanba fatin ne’e sagradu, tanba ne’e husu grasa no tulun, la’ós ba iha sítiu ne’e atu halo atividade seluk hanesan bandalizmu no sunu rai inklui tesi ai arbiru,” nia subliña.

Ho nune’e, José Filipe afirma MTKI no Dioseze Dili inklui autoridade lokál kontinua koopera malu hodi halo jestaun di’ak ba sítiu Nain-Feto Ramelau atu vizitante sira labele soe lixu arbiru no bele garante sítiu ne’e moos.

Tuir dadus MTKI hatudu katak sítiu Nain-Feto Ramelau mak temporariamente hetan vizita turista doméstiku barak liu kompara ho fatin turístiku sira seluk.

Entretantu MTKI ho Dioseze Dili mós monta ona seguransa no regra sira iha sítiu relijiozu ne’e atu vizitante sira labele lori katana, tua no eskeru.

Jornalista: Florêncio Miranda Ximenes

Editora: Julia Chatarina 

iklan
iklan

Leave a Reply

iklan
error: Content is protected !!