DILI, 01 jullu 2020 (TATOLI)-Servisu Autónomu Medikamentu no Ekipamentu Saúde (SAMES), daudaun ne’e esforsu hela atu importa ona ekipamentu Laboratóriu Nasionál nian mai Timor-Leste durante semana ida ne’e.
Diretór Ezekutivu SAMES, Santana Martins, informa ekipamentu laboratóriu hanesan vidrus ho ninia funsaun atu hasai no koko pasiente sira-nia ran, oras ne’e iha hela Aeroportu Darwin Austrália tanba laiha aviaun mamuk atu tula mai Timor-Leste.
”Ita espera katak ohin bele mai bainhira aviaun ne’e mamuk tanba ita-nia produtu vidrus ne’e kuaze aviaun ida ne’ebé mak tenki tula mai maibe tanba la iha espasu entaun adia hela deit,”esplika Santana Martins, ba jornalista sira iha Kampung-Alor Dili, ohin.
Nia esplika fasilidade ba Laboratóriu Nasionál ne’e hamutuk iha kaixa 14 tanba ne’e presiza espasu natoon hodi tula hotu kedas ekipamentu ne’e mai rai-laran.
Jornalista : Felicidade Ximenes
Editór : Agapito dos Santos
