DILI, 02 jullu 2020 (TATOLI) – Sekretáriu Estadu Formasaun Profisionál Empregu, Alarico do Rosário rejeita informasaun ne’ebé dehan maioria traballadór sira ne’ebé bá serbisu iha Austrália ho Korea husi Partidu Kmanek Haburas Unidade Nasionál Timor-oan (KHUNTO).
Tuir Alarico, prosesu rekrutamentu traballadór sira la’ós iha VIII Governu nia tempu, maibé dezde Governu sira uluk haruka ona timor-oan sira ba serbisu iha rai-li’ur no daudaun Governu atuál atu kontinua de’it programa sira ne’ebé mak la’o ona.
“Ida-ne’e laloos, sé maka ko’alia dehan nia tenki ema KHUNTO? enkuantu ema ne’ebé ita haruka bá ne’e nia prosesu rekrutamentu la’ós ami-nia mandatu maibé sira bá dezde kedan Governu ida uluk. Entaun nia-naran tama iha sistema no ema foin husu mai mak haruka. Uluk KHUNTO seidauk eziste nusa mak partidu foun ne’e bele haruka uluk ema bá,” dehan Sekretáriu Estadu Alarico, hafoin ramata enkontru ho Primeiru-Ministru, Taur Matan Ruak iha Palásiu Governu, kinta ne’e.
Governante ne’e klarifika, prosesu teste servisu iha Korea ho sistema online, tanba ne’e kuandu la liu la’ós kulpa Sekretaria Estadu Formasaun Profisionál Empregu (SEFOPE) nian.
“Prosesu ida mak ha’u presiza fó hatene kona-ba rekrutamentu traballadór bá Korea, kuandu iha kursu fatin ami Sekretáriu Estadu, Diretór Jerál sira mós labele mete tama iha laran tanba teste ne’e sistema online no ida fó teste ne’e hela iha korea, enkuantu ida na’in ba teste ne’e iha Becora. Hafoin teste online nia la liu responde husi komputadór, KHUNTO nia-oan ne’ebé mak tur fali iha Korea, nia rezultadu fó sai kedas,” Alarico klarifika.
Nia konsidera, ema ne’ebé akuza Partidu KHUNTO mak fasilita timor-oan sira servisu iha Korea no Austrália ne’e, ko’alia tuir sira-nia hakarak tanba laiha faktu no prova loloos.
“Ha’u husu ba joven iha Timór laran tomak, hadi’a mak imi-nia kapasidade, hadi’a mak imi-nia mentalidade, prepara imi-nia an didi’ak tanba sé de’it mak tuir teste maka rezultadu hatudu nia liu, nia iha direitu atu bá,” apela Alarico.
Governante ne’e subliña, bainhira públiku iha evidénsia katak KHUNTO mak fasilita timor-oan sira bá serbisu iha Korea ho Austrália tanba envolve-an iha Partidu KHUNTO, bele hato’o keixa atu nune’e bele prosesa tuir dalan legál.
Tuir dadus husi SEFOPE, husi tinan 2014 to’o 2018, timor-oan hamutuk 2.819 maka servisu ona iha Austrália liuhosi programa Seasonal Worker iha área ospitalidade no ortikultura no konsege rekolla retornu milliaun $9.698.579,15 mai Timor-Leste.
Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, 2017 na’in-782, 2018 ema na’in-1.380 no 2019 ema lima.
Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun servisu repetidu to’o dala haat hafoin kompleta servisu ho durasaun fulan-neen, bazea ba prestasaun servisu traballadór iha kompañia sira.
Enkuantu, daudaun ne’e traballadór timoroan 3.000-resin maka servisu iha Korea Súl.
Jornalista: Antónia Gusmão
Editora: Julia Chatarina
