DILI, 02 jullu 2020 (TATOLI)- Eis Komandante Polísia Nasionál Timor-Leste (PNTL) Munisípiu Dili, Superintendente Xefe Armando Monteiro, ohin, ofisiálmente entrega rota Komandu Polísia Munisípiu Dili nian ba Komandante foun Polísia Dili nian, Superintendente Xefe Hendrique da Costa.
Notísia Relevante : Komandu PNTL Tane Mensajen Xave Hosi PM Taur
Serimónia entrega rota komandu ne’e asiste diretamente hosi Komandante Jerál PNTL, Komisáriu Faustino da Costa, ho parade militár ne’ebé asiste mós hosi komandante eskuadra sira area jurizdisaun Munisípiu Dili nian.
Komisáriu Faustino da Costa, dehan nia asiste serimónia ne’e hodi bele fó orientasaun jerál ba komandante na’in-rua ho membru sira tomak, oinsá bele koopera hodi garante seguransa iha Dili nu’udar kapitál nasaun Timor-Leste hodi garante sosiedade moris hakmatek.
Nia hatutan, polítika rotasaun servisu ba komandante sira atu evita komandante ida labele servisu kleur liu, nune’e muda komandante sira ba munisipiu seluk atu bele implementa sira nia kapasidade iha fatin ka ambiente ne’ebé bele dezenvolve sira nia profisionalizmu.
“Ha’u hatene komandante na’in-rua (Armando-Henrique) ne’e kuandu ha’u hasai orden muda sira na’in-rua, sira sente todan hotu, maibé komandante na’in-rua iha esperiénsia kaer hotu komandante munisípiu hotu, sira na’in-rua eis komandante operasaun nasionál hotu, ha’u la duvida ho sira na’in-rua nia kapasidade,” hateten Komisáriu Faustino da Costa iha nia diskursu.
Nia hatutan, durante tinan-17, Komandu PNTL buka atu hadi’a problema sira ne’ebé akontese iha PNTL no koopera nafatin ho Governu Timor-Leste hodi halo promosaun ba komandante no membru, inklui kria kondisaun hasa’e rekursu membru no apoiu servisu transporte no seluk tan.
Iha fatin hanesan Superintendente Xefe, Armando Monteiro hato’o agradese ba konfiansa servisu ne’ebé Komandu Jerál fó ba nia hodi lidera Dili durante tinan ida resin.
Armando dehan, Polísia Dili kuaze ema na’in-500 durante ne’e hala’o servisu di’ak tebes hodi koopera ho autoridade suku, Ofisiál Polísia Suku (OPS), membru Konsellu Polisiamentu Komunitáriu (KPK) hodi halo vijilánsia no minimiza kazu krime iha Dili laran.
“Agradese ba Aman Maromak nia grasa no bensaun ohin kmanek ida ne’e ita nia lei prezensa Komandante jerál sai hanesan sasin hodi diarize serimónia simples ne’e. Ita hotu akompaña asiste serimónia rotasaun ba ami nivel superiór Polísia na’in- 25 nu’udar prosesu normál no bele akontese mós ba sarjentu no ajente sira. Tanba rotasaun ho mudansa ida ejijénsia Estadu nian,” Armando Monteiro hateten.
Nia hato’o agradese ba estrutura Komandu Dili hahú husu membru tomak ne’ebé too autoridade lokál, estudante universitáriu no mídia ne’ebé iha kolaborasaun ida di’ak tebes hodi akompaña operasaun PNTL nian durante ne’e.
“Ha’u nia mandatu hasoru situasaun difisil ho estabilidade polítika nasionál ne’ebé akontese no aumenta ho COVID-19 ita la halo servisu 100%, maibé pelumenus ita bele fó apoiu ba povu no estadu atu bele satisfás ho ita nia servisu,” nia tenik.
Armando espera komandante Henrique ho segundu komandante Euclides Belo bele kontinua investiga krime sira ne’ebé sei pendente hodi buka tuir autór krime sira prosesa tuir lei.
“Konta ho ha’u nia apoiu, ita kontinua garante nafatin estabilidade seguransa iha Dili too ba munisípiu hotu,” Armando Monteiro hatutan.
Iha fatin hanesan, Superintendente Xefe, Hendrique da Costa, hato’o agradese ba konfiansa Komandu Jerál PNTL nian ne’ebé aposta konfiansa ba nia hodi lidera seguransa iha area jurizdisaun Dili nian hanesan kapitál nasaun.
“Agradese ba ita boot nia esforsu tinan ida hodi garante pás iha tempu ne’ebé difisil ho sitasaun polítika iha Dili hodi garante seguransa. Ha’u hato’o ha’u nia votu susesu ba knaar foun hanesan Komandante foun ba Munisípiu Baucau hodi halo buat di’ak liután,” afirtma Hendrique.
Hendrique dehan, planu no programa sira ne’ebé implementa ona iha Munisípiu Dili nia parte sei kontinua implementa hodi dezenvolve servisu Komandu Dili ba oin.
“Ita boot nia obra ne’ebé halon ona ita sei kontinua halo di’ak liután ba oin, tanba dezenvolvimentu PNTL depende ba estratéjia kada komandante munisípiu hodi implementa tuir situasaun iha Dili,” dehan Hendrique.
Nia apela ba membru polísia Dili atu kontinua servisu maka’as ho profisionalizmu no dixiplina nu’udar xave importante hodi kumpre polítika Governu nian atu lori susesu ba instituisaun PNTL.
Jornalista : Eugénio Pereira
Editór : Francisco Simões
