DILI, 07 jullu 2020 (TATOLI) – Voo dahaat apoiu servisu aérea umanitária husi Programa Ai-han Mundiál (WFP, sigla inglés) ba situasaun COVID-19 sei mai tan iha Timor-Leste iha kuarta ne’e.
Tuir nota imprensa ne’ebé Agência Tatoli asesu iha tersa ne’e, voo ho aviaun ne’ebé aluga husi WFO ne’e maihusi Kuala Lumpur, Malázia no sei lori pasajeiru hamutuk 16 no kargo kilograma 76.
Iha juñu nia laran, servisu aérea ho aviaun Malaysia Airlines ne’e, atera ona iha Aeroportu Internasionál Prezidente Nicolau Lobato, Comoro iha loron 14, 21 no 28 juñu hodi fornese servisu ba pasajeiru hamutuk 48 no transporte kargo abastesimentu sasán médiku kilograma 1.879 ba Organizasaun Mundiál Saúde (OMS) iha Timor-Leste, World Vision no WFP
“COVID-19 halo distúrbiu sistema transporte globál no afeta kapasidade traballadór saúde umanitária atu responde. OMS, ajénsia Organizasaun Nasaun Unida (ONU), komunidade Organizasaun Naun Govermentál (ONG) no Governu sira uza WFP nia kapasidade lojístika no koñesimentu hodi apoia no fornese voo hirak ne’e bainhira voo komersiál internasionál seidauk eziste hodi asegura katak traballadór saúde umanitáriu no kargo hirak ne´e bele lori ba fatin ne´ebé ema presiza tebes,” subliña nota ne’e.
Dezde lansamentu servisu aérea komún iha maiu tinan ne’e, WFP transporta ona pasajeiru 500 resin no voo kargo ba fatin sira iha Áfrika, Ázia, Amérika Latina no Médiu Oriente ho traballadór umanitáriu no saúde hamutuk 5.000 resin husi organizasaun 200 ba destinasaun 43 ne’ebé ema presiza tebes ajuda.
Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl 2020 deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.
Jornalista: Natalino Costa
Editora: Julia Chatarina
