DILI, 08 jullu 2020 (TATOLI) – Ezekutivu sira liuhosi Konsellu Ministru (KM) iha kuarta ne’e aprova tetu ba Dotasaun Orsamentu Temporária (DOT) ba fulan-jullu nian ho valór millaun $120,531.5 ne’ebé inklui mós pagamentu ba empréstimu, enkuantu eksklui empréstimu sai millaun $113,281.5
“Konsellu Ministru aprova projetu deliberasaun ne’ebé aprezenta hosi Ministru Finansa, Fernando Hanjam, kona-ba tetu finál ba dotasaun temporária ba fulan-jullu 2020 ho valór fiksu millaun $120,7 inklui pagamentu ba empréstimu,’ relata Ministru ba Prezidénsia Konsellu Ministru, Fidelis Manuel Leite Magalhães hafoin reuniaun KM, iha Palásiu Governu.
DOT fulan ne’e fahe ba kategoria lima hanesan saláriu no vensimentu millaun $17,981,2, bens no servisu millaun $40,186.7, tranferénsia públika millaun $26,721.1, kapitál menór millaun $2,251.1 no kapitál dezenvolvimentu millaun $33,391.
Antes ne’e, ezekutivu sira aprova mós DOT ba fulan-juñu nian ho montante millaun $122,3 inklui pagamentu ba empréstimu.
Antes ne’e, Vise-Ministra Finansa, Sara Lobo Brites, informa durante implementasaun Estadu Emerjénsia Governu ladún iha atividade tanba ne’e maka gastu reál mensál hamutuk pur volta millaun $56 to’o $65.
Governu fiksa DOT ba fulan-maiu nian ho montante millaun $122 (inklui empréstimu) maibé bainhira esklui empréstimu millaun $114, ne’ebé fahe ba kategoria haat hanesan saláriu no vensimentu millaun $17,852, bens no servisu millaun $44,894, transferénsia públika millaun $26,591, no kapitál dezenvolvimentu millaun $26,242, esklui kapitál menór.
DOT ba fulan-abríl 2020 iha ámbitu rejime doudesimál ho montante $114.887.000, la inklui empréstimu.
Ba fulan-marsu ho montante $116.449,057, ne’ebé husi totál ne’e fahe ba kategoria saláriu no vensimentu hamutuk $17.852,076, kategoria bens no servisu $38.614,980, transfénsia públika $16.591,048 no kapitál dezenvolvimentu $33.390,953, esklui kapitál menór.
Nune’e mós, aprova DOT ba fevereiru ho montante $116.449,057, ne’ebé totál despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390,953.
Dotasaun ba janeiru ho valór millaun $116, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.
Utilizasaun rejime duodesimál sura hosi prosesu aprovasaun Proposta Lei Orsamentu Jerál Estadu (OJE) 2020, ne’ebé seidauk konklui no la tama vigór iha 1 janeiru 2020.
Nune’e, rejime ne’e sei ramata automatikamente bainhira orsamentu 2020 tama iha vigór.
Regra no prosedimentu aplikasaun rejime duodesimál ba instituisaun Estadu hotu presiza prepara DOT bazeia ba prinsípiu rua mak hanesan dotasaun orsamentál kobre de’it despeza durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define ona tuir Lei OJE númeru 13/2016.
Jornalista: Antónia Gusmão
Editora: Julia Chatarina
