DILI, 08 jullu 2020 (TATOLI) – La posível ona atu Governu Timor-Leste asesu apoiu atu utiliza balansu (saldu) fundu impréstimu husi Banku Dezenvolvimentu Aziátiku (ADB, sigla inglés) ba konstrusaun estrada Estrada Rotunda Comoro to’o Tasi-Tolu tanba prosesu burokrásia no pandemia Globál COVID-19, maka Ministériu Obra Públika (MOP) sei lori ba Konsellu Administrasaun Fundu Infraestutura (KAFI) atu deside.
“Ami sei lori proposta ne’e ba KAFI atu deside, tanba ami atu husu apoiu ba ADB maibé sira-nia prosesu burukrasia no surtu COVID-19 ne’ebé sei kle’ur tebes atu aprova pedidu re-alokasaun Fundu Impréstimu ne’e,” tenik Ministru Obra Públika, Salvador Eugênio Soares dos Reis Pires, iha Palásiu Governu, kuarta ne’e.
Ministru Salvador dehan, Governu hatama proposta ba ADB ne’e fizikamente ekipa ADB tenke mai iha Timor-Leste atu haree no avalia, hafoin aprova pedidu apoiu fundu ne’e.
“Agora la posível ona tanba ekipa ADB labele mai tanba situasaun nasaun barak sei lockdown. Tanba ne’e tempu badak ita sei lori ba KAFI atu deside ita bele finansia rasik konstrusaun estrada ne’e,” nia subliña.
Razaun lori ba KAFI, tuir governante ne’e tanba preparasaun Governu Timor-Leste nian liuhosi MOP hamutuk ho Ministériu Finansa (MF) atu aselera prosesu preparasaun konstrusaun estrada trosu rotunda Prezidente Nicolau Lobato, Comoro to’o iha inter-seksaun Tibar nian (seksaun 1, naruk hamutuk kilómetru 1,9).
Projetu konstrusaun ne’e, Governu konsidera estratéjiku tebes ba Timor-Leste tanba fasilita no sei hasa’e mobilidade ema no sasán, liuliu relasiona ho operasionalizasaun Portu Baía Tibar nian iha tinan-2021.
Estrada Rotunda Comoro to’o Tasi-Tolu kuaze kilómetru rua hamutuk ho pakote estrada trosu Tibar to’o Tasi-Tolu ne’ebé responsável husi obra ne’e maka kompañia internasionál, China Wuyi ho kustu obra millaun $12-resin.
Obra ne’e rasik, hahú ona iha loron 28 fevereiru 2017 to’o tuir planu sei ramata iha outubru 2019, maibé tanba situasaun atuál maka obra ne’e adia.
Governu iha ona akordu ho kompañia ne’ebé agora daudaun halo konstrusaun ba Portu Baía Tibar, katak estrada refere tenke finaliza iha agostu 2021.
Bainhira estrada seidauk finaliza tuir akordu, Governu Timor-Leste sei hetan multa no selu osan lubuk ida ba kompañia ne’ebé halo konstrusaun ba Portu Tibar.
Jornalista: Florêncio Miranda Ximenes
Editora: Julia Chatarina
